- Hruaia Kawlni Kum 1970 bawr chho velah Hollywood lemchanthiam lar Steve McQueen te ho in Auto-racing an buaipui a, car chak tak a an lim ziai ziai lai khan Keini chu rambuai karah Silchar leh Aizawl inkar pawh ni 2/3 lai sipai convoy karah kan la thang a, tihfuh loh tum phei chuan chawlhkar khat dawn dawn te an hmang thin a nih kha. Kan inang lo teh e. Tunah chuan khawvel khawpui dang ang maiin thil dangah intodelh lo mah ila, kan khawpui ber Aizawlah na na na chuan Traffic jam lamah khawpui dangte kan umpha ve thuak thuak. Kan ropui tehna pawh hun eng emaw lai atang khan mitthi vuinaah vantlang kawng rei tak dangpinga thlalak leh a vuitu lokal khawmte lirthei kawngsira hun tam leh tam lohah te a ni ta nawk a. Chhiatni thatni leh puipun nikhua reng rengin a lo tela te lirthei rawn hawl chhuah dahkhawm chuan ropuina a keng telah kan ngai a. Tam hi chakna leh lalna a ni tih hrechiang tak political party-te phei chuan khawpui daifema inkhawmpui ai chuan Aizawl lailum leh lunlai tak, Vanapa Hall-a leng leh leng lova inekbeng nghek a, chu thilin vanltang kawngpui namen lova a tihbuai leh chumi chingfel tura Traffic Police phili buaite chu party ropuina leh tam anga mi dang mithmuha lantirna ropui takah an ruat thin. Mi dang tumah bum lovin anmahni leh anmahni an inbum a, MNF sorkar lai pawh khan tum khat chu an hotupa thusawiin, Traffic an tih jam mup mup avanga an party kalkhawm ropui a tihzia a sawi chhuak nia!! Anni chang an ni lo, Party dang pawh an bang chuang awm lo ve. Tunlai harhna kawngzawng ‘inbingbilet’ ni thum chhung ngawt mai Aizawl kawtthler fan chhuah nan an hman lai khan tum hnih khat chu ka chhuak tur min titangkhang a. “Thla tin emaw kum tin pawha tih reng tur ni lem lo, lungawilo pawhin kawng an zawh fo va, Pathian avanga lawmna changte kawngzawh phei chu phunnawi lovin nghak mai teh ang,” tiin, ka nghak mai a, a hnu lamah pawh ka sawisel zui miah lo. A inbingbilette phei kha chu an fakawm, khatiang ang kha han tih ve mai mai chi pawh a ni lo. Amaherawhchu, a hnuah kha kawngzawh TV report ka thlir leh hnuah interview thenkhatin lirthei che thei mang lova Aizawl khawpui a aikhirh tlat leh traffic jam nasa tak avang lirthei tlan dan mumal lote kha Pathian ropuina leh kha kawngzawh tiropuitu ni awm hiala an sawite erawh kha chuan ka thin a khei zak thung. Pathian ropuina hi Traffic Jam leh Jam lohvah mai mai teh chi a ni lo va, kha kawngzawh kha tha ka lo tih ve tehreng nen a thlirtu leh a chimtu tam tak rilru erawh chu tute emaw tawngkam takin ‘value system’ dik lovin a eichhe nasa tawh hle ni awm tak a ni. Khawpui daifem mi tam tak awm lohna kawngpui khawharah pawh kawng zawh se Pathian ropuina a nep chuang lo vang a, taksa tawrhna nasa tak huama inbingbilet te pawh Pathian mithmuhah an inpekna a nep chuang miahin ka ring lo. An kawngzawh ni lovin an kawngzawh thlirtu leh chhimtute ngaihdan erawh dik tawk lo a awm, hemi chungchang hi Pu H.C.Vanlalruata khan chanchinbu lamah a rawn thlai lang tawh a, a pawmawm viau mai. Mihring khawsak phung lo thang zel leh thingtlang atang khawpui pem lut kan tam tak tial tial avang te, lirthei lo pung zel leh khawpui ruahmanna felfai awm lova kan din avang te, kawngpui zim lutuk avang te, lirthei hun dan mumal loh avang te hian keini chauh ni lovin, a khawpui lian leh mipui tamna apiang maiah hian traffic a Jam nasa emaw tih mai tur a ni. China khi khawvela ram thangduang leh mihring tamna ber a ni bawk a, tunah khian kum khatah 14 million lai car lei ang an ni a, lirthei 650,000 vel zelin thla khatah kawngpui an zawh thar ang velin an chhut nia!! Kum 2010 khan Beijing bul Beijing-Tibet Expressway an tihah chuan ni 12 zet traffic a jam a he traffic jam hian km 100 zet a thui a awh nghe nghe. Khawvel khawpui lian zawng zawng leh India ramah pawh vai ram khawpui lianah traffic jam nasa lutuk hi thuneitute lu tihaitu nasa tak a ni ta zel a, Engineering and Tehnology University tam takah chuan heng thil lo thlen dan leh a tihnep dan tur hi a zirin an zir hial tawh a. IST an tih mai, Intelligent Transport System-te hi khawvel ram dangah chuan an siam chhuak a, heng khawl hmangte hian lirthei veivak an thunun a, mihringin a vil ngawt aiin nasa takin an tangkaipui. The Telegraph chanchinbuin a zirchiannaah phei chuan, “London khawpui-ah khuan traffic jam avangin motor khaltu hian kum khatah darkar 30 lai hun a hlauh a ni,” an ti. London bakah Greater Manchester leh Merseyside te hi a jam nasatna khawpui a ni a, kum 2012 ai khan darkar khat laiin traffic jam-a driver-te hun khawhral hi a tam tawh zawk nghe nghe. Hetiang khawpa khawpui dangte pawhin an buaipui em em a nih avang hian tul tawpah lo chuan keini pawh hian kan khawpui hi tu tute emaw phur thut thiltih ang chi leh pumpelh theihah hi chuan i tibuai lo hram hram ang u. Tam tak punkhawmnate phei hi chu hmunhma rem zawk leh nuam zawk, khawpui daifemah te hian tih ching tawh zawk ila, TRAFFIC JAM HI ROPUI TEHNA AH HMANG TAWH LO VANG U.