ZALEN September 29, 2026: October ni 1 atanga Sairang, Aizawl - Lamka, Manipur inter-State Bus Service tur, mi 21 chuan theihna Bus pahnih chu vawiin khan Transport Minister Vanlalhlana chuan Transport Office tualzawl, Chaltlang atangin a vai liam a. Adviser to Chief Minister (Technical) Er. H. Ginzalala, MLA chuan he hun hi hmanpuiin, Mizoram State Transport Authority member-te, Transport Department-a thawktute leh VK Tawna Travels enkawltute an tel a ni.

PWD Minister Vanlalhlana chuan, hnam ropuia insiam tur chuan tlang hrang hranga cheng zohnahthlakte kan inlungrual a pawimawh thu sawiin, Mizoram chu zohnahthlakte inpui a nih thu a sawi a. Manipur-a chi leh chi inkara buaina thleng avanga zin veivah kawnga zohnahthlakten harsatna an tawk thin chu pawi a tih thu sawiin, vawiin program hmanna hian Manipur leh Mizoram inkar zin veivakte harsatna thui tak a sutkian ngei a beisei, tih a sawi a. Inunauna, inluangrualna leh inpumkhatna tha zawk siamna kawnga hmanraw tangkai tak a nih ngei a beisei thu a sawi bawk a ni.

VK Tawna Travels CEO Siamnunlian Valte chuan VK Tawna Inter-State Bus Service kalpui dan tur chungchang sawi zauna a nei a. Er. R. Lalrammawia, Director, Transport Department chuan Inter-State Bus Service chungchanga hriattur pawimawh hrang hrang a sawi bawk a ni.

VK Tawna Inter-State Bus Service ah hian Bus pahnih, mi 21 ve ve phur thei an tlan dawn a. Lamka, Manipur leh Sairang, Aizawl inkar nitin Bus Service a awm dawn a ni. Sairang – Lamka inkar hi km 360 bawr vela hla niin darkar 12 vel thang tura ngaih a ni a. Bus chuan man hi Cheng 2,500 a ni ang a. VK Tawna Bus Service Mobile Application hmangin on-line in Bus ticket hi a book theih bawk dawn a ni.