Fa an neih hnuah inti taurauin an inchhuahsan lawp lawp a, tunah erawh an inkar a tha leh tawh tih social media kaltlangin an nemnghet. 

Travis Scott leh Kylie Jenner te hi New York City-ah an kal dun a, an fanu Stormi Webster pawh an hruai. Parsons Benefit 2021-ah an tel a, he hunah hian milar dang pawh hmuh tur an awm nual.

He hunah hian Travis Scott hian Parsons Benefit Award dawngin, a thusawiah Kylie Jenner a hmangaihthu a sawi chhuak. Travis Scott, Kylie Jenner leh Stormi te hian red carpet an zawh ho a, hei hi social media lamah an post bawk. 

American rapper Travis Scott leh Kylie Jenner te hi kum hnih dawn an inthen hman a, tunah erawh an chhungkuaa thla an lak hona social media lamah an pholan leh tak chuai chuai avangin an inkar a tha leh tawh tih an tarlanna a ni ber. 

Hetih lai hian ‘Keeping Up With The Kardashians’ star Kylie Jenner hian a bialpa hlui leh hun eng emaw chen a lo kawp ve tawh thin, American rapper Tyga nen chuan thian pawh an nih tawh loh thu tun hnai khan a sawi chhuak mauh mai. 

“Thian kan ni tawh lo. Mahse, engkim a tha e, a lakah rilru chhia ka pu lo,” tiin, kum 2014 chhoa a lo date tawh thin Tyga chungchang an zawhna a chhang.