Aizawl; Tlawmngai pawl hrang hrang 5 - Central YMA, MHIP, MUP, MZP leh MSU intelkhawm Joint NGO chuan Tripura Transit Camp-a Tuikuk awmte vote thlaktir leh tum a nih duhloh lantir nan Aizawlah 'Protest Day' an hmang dawn a, Millenium Centre atanga Election Office, Khatla thleng kawng an zawh ang. Joint NGO hruaitute hian nimin khan Protest Day an hman tur chungchang sawifiahin Aizawl Press Club ah chanchinbumite an kawm a, Joint NGO Chairman Lalbiakzuala chuan, Tripura a awm mek Tuikukte chu Mizoram Electoral Roll atanga paih an nih theih nan theihtawp an chhuah dawn tih a sawi. Tripura-a tlanchhia Tuikuk zingah mi 4,000 vel lo let tawhin tunah hian mi 26,000 vel an la awm mek nia an hriat thu Lalbiakzuala chuan a sawi a. Heng tlanchhiate hi NGO hrang hrangte chuan an lo let leh hi duhin vawi tam tak an ko tawh a, mahse, an lo let loh mai bakah, Election Commission-in postal ballot hmanga an awmna hmun ngeia vote thlaktir leh a tum nia sawiin, Transit Camp-a vote thlak chu an duhlo tak zet tih a sawi. "Political party tumah campaign turin an camp ah hian kallo se kan ti a, kallui an awm chuan NGO ten an chungchang an la sawiho ang," Jt. NGO Chairman chuan a ti a. Transit Camp-ah suahsualna chi hrang hrang a pun thu leh hei hi nuaibo an duh tih a sawi a. 'Protest Day' a kawngzawh (peaceful march) an neih turah, Mizo mipui zawng zawng tel turin an sawm tih a sawi bawk. MZP President Lalhmachhuana chuan, Tuikuk te chu rikrap vanga tlanchhia an nihloh vangin refugee dang nen an in anglo tih sawiin, Autonomous District Council an ngiat vanga thil ti mai mai niin a sawi a. MSU President Zodinpuia chuan, Tuikuk te vote thlak tir loh hrim hrim chu an tum a ni lo tih sawiin, E/Roll-a an awmnaah thlak mai se an duh tih a sawi bawk. MHP Vice President Dr. Thanpuii chuan, Tuikuk te chu an Camp-a vote thlaktir an nih dawn chuan, India ram hmundanga Mizo awmte pawh an awmna hmunah vote thlaktir ve an phut tih a sawi a. MUP General Secretary Sainghinga chuan, Mizo mipuiten haw an phal chunga haw duhlote, a bika tih zel chu an pawl chuan awm lo an ti niin a sawi. Peace Rally hi ruahman dan chuan kawngzawh bultanna Millennium Centre bulah MUP leh MZP aiawh ten thu an sawi ang a, Vanapa Hall kawtah MSU leh MHIP aiawh, Election deptt. office kawtah Central YMA aiawh ten thu an sawi ang a. Kawngzawh tawpah Joint Resolution siam a ni ang a, Tuikuk te chuanna E/Roll leh Election Commission-in Tuikuk te vote thlaktir tura a tihna order copy hal a ni bawk ang.