Aizawl: Mizoram-a kir duh lo Bru 34,000 chuangte chu Tripura a an awm zui phalsak an ni tawh a, hemi ang hian tun dinhmunah Bru chhungkua za a 75 bawr vel ten an inbenbel nghehna tur hmun an luah fel thawkhat tawh.

Mizoram Bru Displaced People Forum (MBDPF) General Secretary Bruno Msha hnen atanga ZALEN thudawn danin, tun dinhmunah Bru chhungkaw 2,500 bawr vel an inbenbelna tur hmun la tifel lo an awm a, a bak zawng za a 75 bawr vel te awma tur chu tihfel tawh niin, an luahlut fel thawkhat tawh a, central sawrkar atanga an hmuh tur in sak tanpuina la hmu lo erawh tlem a zawng an la awm.  

Bruno Msha sawi danin, Bru camp hrang hrang zingah Khakchangpara relief camp chu rauhsan a ni tawh a, camp dang, Kaskau, Hamsapara, Naisingpara, Asapara te chu inben zui nan a hman zui tur a ni.

Relief camp atanga Tripira a awm nghet turte hi chhawmdawlna, Rehabilitation package chhungkaw khatah cheng nuai 4 zel  pek an ni dawn a. In sakna tur ram ft. 30x40 a zau pek tur niin chhungkaw tin hi In sak tanpuina Rs. 150,000/- theuh pek tur an ni.

Heng bakah hian Tripura a awmna tur hmun thar an khuar tirh atanga kum hnih chhung chu chhungkaw tinte hi thla tin Rs. 5000/- theuh puihna pek an ni anga, a thlawna ration pein Tripura sawrkar in a remchan dan angin PRC leh ST Certificate a buaipui sak dawn bakah electoral roll-ah an hming te thun sak tur an ni bawk.