Aizawl; Election Commission of India chuan, Tripura-a Tuikuk tlan-chhia nia insawite tan an awmna Tripura Transit Camp-ah vote an thlak dan tur a rua-hman. Tripura-a Tuikuk te vote thlak hi Mizoram sorkarin buaipui lovin, Tripura sorkarin a buaipui ang a, Mizoram atangin a viltu tur Official 4/5 vel tirh a ni ang. Tuikuk te hian vote an thlak zawh veleh an ballot box chu Mizoram panpui nghal a ni ang. Mizoram a tlawmngai pawl hrang hrangte chuan Tuikuk te hi Tripura ah vote thlak tir tawh lova, vote an neih-na hmun Mizoram chhung ngeiah vote thlak tir tawh turin Election Commission ah ngenna an thlen a, Commission-in Home Ministry a biak rawn hnuah Home Ministry thurawn angin Tripura-ah vote thlak leh turin a ti ta a ni. Zalen palaiin a kawm naah Joint Chief Electoral Officer H Lalengmawia chuan MLA inthlan a an budget chu vaibelchhe 24.3 a ni tiin motor hman man leh thildang ba an neih chu an pe zo tawh tih a sawi a, "Tun tum Lok Sabha inthlan a hman turin vaibelchhe 20 min pe leh a, MLA inthlan ai chuan a hautak lo deuh turah kan ngai a, kan daih theih mai kan beisei a ni," a ti.