Bank lian ber State Bank of India chuan Samaritans for the Blind Association leh Central YMA te hman tangkai turin bus a pe ve ve a, thil awm ngai zen zen lo a ni a, Bank te’n khawtlang tana luanchhuah an zir tan hi a lawmawm hle. Bank chauh nilovin sumdawng liante’n Corporate Social Responsibilty (CSR) hmangin khawtlang tan pek let an nei thin tur a ni a, bank pawh hi sumdawng tho an nih avangin mawhphurhna nei zingah an tel a ni. Tunhnai mai khan CYMA chuan Mizoram chhunga bank awmte chu mipuiin pawisa an dahluh tlingkhawm atangin loan a pek chhuah ‘Credit Ratio’ an neih zat a zawt tawh a, ram pum huap bank te’n an chhang tha lo hle a ni. Mizoram tualchhung bank MRB leh Apex te chuan Credit Ratio hi an hmang tha hle a, bank thenkhat chuan mipui pawisa tlingkhawm hi an hmang chhuak mang lo thung. Hetih lai hian hmanni lawka Mizorama bank inhawng tharah te chuan Mizo mipui te’n vaibelchhe tel tam tak an dah hman lawi si! Bank hi pawisa vawnghimtu chauh an ni lova pawisa dahluh virvel hmanga sumdawng an ni. Kan ram a pachhe em em a, thawhchhuah mumal a awm loh avangin pawisa virvel tam thei ang ber hi hmun danga luang liam lo turin kan ram chhungah vir tir a ngai a; heng hmang hian kan ram ‘entrepreneur’ te tan hun remchang siamsak a pawimawh hle bawk. Ram pum huap bank thenkhatte’n hemi lamah hian hma an lak a la tul hle a, mipui pawh an zirtir tur a ni. Ram pum huap bank te hi thinhrik tur tihna nilovin mipui hian tualchhung bank te an hlut thiam tur a ni a, an duhsak tur pawh a ni. Hetiang chiah hian tualchhung bank te pawh dawr nuamin an awm tur a ni a, leilung fate tan hun remchang an siam chhunzawm zel tur a ni a, technology-ah pawh tan an la sauh sauh tur a ni bawk. Hmun kilkhawr zawka awm te hman tangkai turin branch hawn belh zel sela a tha ang. Hetianga indawrtawnna tam zawk a awm thei a nih chuan kan ramin hma a sawn theih a rinawm hle a ni.