August 29, 2023; Mamit Chhimveng All NGO leh VC te bultumin, Mamit Chhimveng mipuite chuan an veng naupang Lalremruata (11) tualthihna an dem zia lantir nan vawiin ah kawng an zawh.

Vawiin kawngzawh hi chawhma sar 10:30 khan tan niin, kawngzawh chhungin an veng a dawr zawng zawngte pawh khar vek a ni.

Kawngzawhna a thusawitute chuan an veng naupang lainatawm tak Lalremruata chunga thil thleng chu an dem takzet tih an sawi a, kut a tawrh dan te, a hliam tawrh dante leh a ruang hmuh a nih dan atangte in mi pakhat thil tih ni thei ah an ngai lo tih an sawi.

Media hrang hrang a tarlan a nih tawh angin, August 18, 2023 atanga chin hriat loa a bo hnua August 23, 2023 chhuna thia hmuh, Lalremruata (11) s/o Lalvulmawii, Mamit Chhimveng thattu chu August 25 tlai khan a inpuang a. Lalremruata thattu hi R Lalrinchhana (21), Mamit High School Veng a ni a, Police hmaaa a inpuan dan chuan, naupang Lalremruata nen hian Mamit Chhimvenga workshop-ah an riak dun a, August 17, 2023 zan khan a zu ruiin a rek hlum a, a tuk August ni 18 zan dar 11 velah ruang an hmuh takna hmun Mamit khelmual bulah a dah.

R Lalrinchhana hian ruang saruaka a awm chhan chu, thawmhnaw ha loa ruang a dah chuan miin Lalremruata a ni tih an hriat chhuah theih loh a beisei vang a ni.

Lalremruata thih thuah hian Mamit police-te chuan mi eng emaw zat thu an zawtfiah a, R Lalrinchhana leh mi dang pakhat chu rinhlelh an kai bik avangin darkar 72 chhung kawl phalna court-ah an dil a ni.

Court phal angin an kawl zui a, thu zawhfiah an nih hnuah R Lalrinchhana chuan August 25, 2023 tlai khan Lalremruata thattu a nih thu a puang a, Central Jail, Aizawla dah turin August 25 zan khan hruai nghal a ni.

Lalremruata hi Mamit Chhimveng YMA-in hun eng emaw chen an zawn hnuah, YMA, Mamit Sub-Headquarters kaihhruaina hnuaiah zawn a ni a, August 23 chhun khan Mamit khelmual bul kawng chhakah thiin hmuh a ni a, saruaka a awm bakah chhawlin khuh a ni.