December 8, 2022; Mamit Luangpawl a a nupui Rokimi (51) leh a tupa (Rokimi fanu fa) kum 7 mi rawng taka thattu nia ngaih Roliana @ Liantea (36) chu ngawrh takin zawn chhunzawm mek a ni a, Aizawl atangin police uisathiam (Canine squad) te pawhin Mamit an thleng tawh nia thudawn a ni.

Mamit atanga ZALEN thudawn danin, a nupui leh a tupa thattu nia ngaih Liantea hi nizan dar 9:20 vel khan Mamit thlang Bawngva bulah Luangpawl atanga thawkchhuak thenkhat ten kawngsir a zu a lo in an hmu a, hriamhrei te a ken avangin a hmutu ten man tum a an hual laiin, an zinga pakhat chu chemin sah a tum a, hemi pah hian ramhnuai pik zingah a bibo a, hemi hnu hian zing dar 2 bawr vel thleng a chinchang an ngaihven hnuah an tin san a, he thu ziahlai thleng hian a chinchang hriat zui a ni ta rih lo a ni.

Police lam ruahmanna siam angin, Aizawl atangin uisathiam te Mamit hruai thlen tawh an ni a, hetihlai hian Mamit Luangpawl khawtlang chuan naktuk ah khawtlang huapin zawn hna thawh an tum a. Mamit atanga thudawn danin Liantea hi Mamit chhehvel ramhnuaiah a bibo nia ngaih a ni a, a kal hlat rin a ni lo.

Liantea hi a nupui leh a tupa boral hnuah tun thleng a a la bikbo avangin tualthattu ni ngei a ngaih a ni a, mipui lam thinrim a sosan tawh avangin police lamin an hmuh hma a khawtual lam mite kuta a awm a hlauhthawnawm viau tawh niin Mamit atanga ZALEN thudawnna chuan a sawi.

Tarlan tawh angin, nimin (December ni 7,2022) zing dar 6 bawr vel khan Mamit Luangpawl ah Rokimi leh a tupa kum 7 mite chu an chenna in ah thi a hmuh an ni a, an taksa hmun hrang hrangah kutthlakna hnuhma a awm a, postmortem an nih hnuin, nimin chawhnu dar 3 khan vui an ni.