May 17, 2023; Serchhip Bukpui leh Chhiahtlang Chhim Veng inkar kawngthlanga thah ni ngei a rin, ruang pakhat chhar chungchangah special investigation team (SIT) din a ni tawh a, he thu ziahlai thleng hian pawikhawihtu man an la awm lo.

ZALEN thudawn danin, NHIDCL computer operator Lalsangzuala (31) Mission Vengthlang, Aizawl ruang chhar chungchangah hian Serchhip SDPO kaihhruai SIT chuan mi engemawzah thu zawhfiah an nei tawh a, hetihlai hian pawikhawihtu man erawh an la awm lo.

Tarlan tawh angin, Chhiahtlang Chhim Venga nupa pakhat, Bukpui rama feh tura kalte chuan May ni 16, 2023 (nimin) zing dar 5 vel khan Chhiahtlang Chhim Veng leh Bukpui inkar kawng, NH-54 ah thisen nasa taka bua an hmu a, an enfiah hnuah kawngthlang feet 50 bawr vela hlaah ruang hi an hmu a ni.

Lalsangzuala hi mi kut tuara boral ngei niin a lang a, a taksa ah kutthlakna hnuhma awmin, a hmai lamah nasa taka kutthlak niin a lang a, kawngpuiah pawh thisen buakna hnuhma hmuh tur thahnem tak a awm.

He thil thleng chungchangah hian nimin lam khan kutthlaktu nia ngaih hnamdang pahnihte man an nih thu, an thlalak nen social media ah thehdarh a ni a, hei hi thu diklo niin, heng thil vawrh darhtute hi Cyber Crime lamin an chhui mek niin ZALEN  chuan a thu a dawng.