Aizawl July 1, 2023 : Ghost Hunter in Dihmunzawl-a thlam pakhat atanga ruang a hmuh C. Vanlallawma (55) thattu nia puh mi 2 chu vawiin Pathianni khan Aizawl District Court-ah hruai niin police te'n darkar 48 kawl an dilna chu phalsak an ni.

C. Vanlallawma thattu nia puh Lalroliana (43) leh Lalsiampuii (40) te hi te hi nupa niin C. Vanlallawma te nen hian an inkawm thin a, thiktu vangin Lalroliana kut a thlaka a thi ta mai nia thudawn a ni.

ZALEN thudawn danin vawiin khan Aizawl District Court-ah tualthattu nia rin mi 2 te hi hruai an ni a, an kutah darkar 48 dang la awm an dil a, case lianah chuan police te hian an kuta awm an dil thin nia sawi a ni. July ni 4 hian court ah inlan lehin Jail lama dahluh beisei a ni.

C. Vanlallawma ruang hi Ramthar Veng, Lunglei-a a unaupa-in lain Lunglei panpui a ni a, nizan khan vui nghal a ni.

RECAP

Hriat tawh angin C. Vanlallawma thattu nia rin mi pahnih - Lalroliana (43) leh Lalsiampuii (40) te chu nimin chawhnu dar 1 vel khan Seling-ah Police-in an man a. 

C. Vanlallawma hi YouTube lama live-a Ghost Hunting ti thin ten Zirtawpni zan khan Dihmunzawl-a thlam pakhatah thi-in an hmu a. Police hriattir nghalin, Forensic lam thiam te'n a ruang an endik hnuah mi kuttuar-a thi ni ngeia rin a nih avangin chhui zui a ni a, rinhlelh pahnih hi Seling-ah an man a ni.