ZALEN Sept. 3, 2024; August ni 23, 2024-a Sairang Dinthar ramchhung, Thlangtlak rama mihuan thlam nghak, Jharkhand lam mi, Hemron (Tlangvaltea) a chenna thlam chhunga a ruang hmuh tak thattu nia rin, JH Rokunga (60) leh a fapa JH Vanlalhriatpuia (20), Samseia te pafa tia hriat larte chu police ten nimin khan an man.

Tualthattu nia rin JH Rokunga hi Vanzau khaw chhuak a ni a, kum tam tak liam tawhah Vanzau hi chhuahsanin a tlawh leh ngai tawh lova, Vanzau khawtlang hruaituten an chanchin hriat zuina an nei ngai tawh lo.

JH Rokunga te pafa hi awmna mumal nei lo an ni a, mobile phone pawh an nei lo a, an hnu chhui a harsa hle niin thudawnna chuan a sawi a, ngawrh taka Mizoram Police ten an chhui hnu-ah nimin khan Rangvamual kawng chhak lama thlam ram deuh tawh pakhat atangin man an ni a, nimin khan Sairang Police Station-ah lak niin vawiinah Court a hruai an ni ang.