May 7, 2024; Tunlai ruahsur vangin tui a nu a, tui tihthianghlim chak theih a nih loh avangin, tui renchem turin mipuite hriattir an ni.

Superintending Engineer, PHE, Aizawl Watsan Circle in mipuite hnena hriattirna leh ngenna a tihchhuah a tarlan a nih danin, tun hnai ruahsur nasa avanga Tlawng lui nasa taka a nut avangin tui tih thianghlim chak theih a ni lo a, hemi avang hian tui thianghlim pump chhuah zat pawh a tlahniam nasa hle a ni.

PHE department chuan tui thlitfim kawngah pawh nasa takin tan a la mek bawk a, he harsatna thleng hi mipuite'n hrethiam a, tui renchem leh ruahtui khawl lam a tan lo la zel turin kan in ngen e, tiin tarlan a ni.

Aizawl tui lakna Tlawng lui hi tunlai ruahsur vangin a nut zawng Nephelometric Unit (NTU) 900 te a kai a, sang 1 kai chang pawh a nei niin ZALEN chuan thu a dawng. Hetihlai hian ei/in tlak a tui sem chhuah thin hi NTU 0 - 1 bawr vel a ni thung.

Thlalak : File picture