ZALEN September 2, 2024 : Mizoram Sawrkara Taxation Department Secretary, S.M. Ali chuan Memo No.J.19011/2/2020-TAX hmangin August 30, 2024 khan thuchhuah a siam a, mah se, hei hi Company leh Filling Station neitu lam chuan an hriatpui lo a, Petrol leh Diesel hi man ngaiin an la hralh.

Thuchhuah ang chuan Petrol leh Diesel rate thar hi September 1, 2024 (Pathianni) atanga hman tan tur kha a ni a, mahse, Company bakah Filling Station te leh a neitute intelkhawmna All Mizoram Petroleum Dealers Association (AMPEDA) chuan order hi an la hmu lo a, vawiin thleng khan rate hlui angin an la hralh.

All Mizoram Petroleum Dealers Association (AMPEDA) lam chuan sawrkar thuchhuah siam dan hi hriatthiam harsa an tih thu an President K. Lalnghakliana chuan ZALEN a hrilh a, Agent a nihna Hindustan Petroleum leh Indian Oil lam chu a biak tawh thu a sawi a, hma an rawn lak dan tur chu a la hriat loh thu a sawi.

Tunhma lam pawhin hetiang hi an lo tawng tawh tih Nghaktea chuan a sawi a, sawrkarin Diesel leh Petrol man a tihhniam thut, coampany lam an hrilh loh avanga dealer ten sum engemaw zat an chawi tawh thu a sawi.

Rate san leh hniam hi Company lam thuneihna a nih avanga leh khawvel thiamna a san tawh avangin an Pump te chu khawl hmanga control vek tawh a nih thu a sawi a, Company lamin an pump-ah rate an la tihsan loh avanga an tawrh dan tur a hriatthiam loh thu AMPEDA President chuan a sawi bawk.