Aizawl: Serchhip district chhunga awm Sialsir khua chu tuihna tihpun leh a awmsa an humhalh that avangin 'Best Village Panchayat-North East Zone' atan thlan an ni a. Tui harsatna khua ni thin kha tui hnianghnar khua ah siam a ni.

    Serchhip PHE a Executive Engineer hna chelh mek Er. F.Sanglura chuan ZALEN zawhna chhangin, "Tunhma chuan Sialsir khua hi tui an harsa thin a. Mahse NABARD sum hmangin ruhtui dahkhawlna tur zem (tanky) 9 kan siam a, tanky pakhat zelah hian tui litres nuai 3 dah theih a ni a. Heng tanky 9 ah hian tui litres nuai 27 dahkhawl theih a ni a, heng tui dahkhawl te hi thal ah an hmang a, tunah chuan tui harsatna a awm tawh lo a ni," a ti. Tui dahkhawl kawngah Sialsir khaw mipuite an tangrual tih sawiin F.Sanglura chuan, "In tinin tui dahkhawlna zem an nei a, ruahtui kalral mai mai tur te an khawl a. Hei mai bakah JJM (Jal Jeevan Mission) hnuaiah in tin tui connection pek an ni bawk a ni," a ti. Sialsir ah hian tui enkawl hna hi WATSAN committee in an thawk niin a sawi bawk. 

    Sialsir VCP K.Vanlalrema pawhin tunhmaa tui harsa thin kha tunah chuan an harsa tawh lo tih sawiin, "Thal tui tlem lai pawhin chhungkaw tin hi kar khatah tui litres 2000 kan pe thei a ni," a ti. Ruahtui kalral mai mai tur an khawl dan sawiin, "Tui luangral mai mai dahkhawlna atan khur kan lai a. Hei mai bakah FOCUS project hnuai atangin check dam te siamin PHE leh IWMP atangin khaw chhungah tanky kan siam bawk a. Chumai bakah khawdai velah ramngaw (reserved forest) kan humhalh tha bawk a, khawtlang kan tanrual that avangin tuiah kan hnianghnar ta niin kan hria," a ti bawk.

    Sialsir khua hi Serchhip district chhunga awm a niin Keitum atanga chhimchhak lamah kalin Chekawn atangin 6kms vela hla a ni a. Tunah hian in 56 awmin mihring hi 340 vel an awm nia hriat a ni. Sialsir hi MNF ramhnuai sawrkarin Parliament session an neihna hmun kha a ni a. Sawrkar puihna in Parliament house sak tumin an inbuatsaih mek.