Mizoram Super League Play In khelh mekah Game-1 match khat naa chak zawk Tuikual South chuan match hnihnaah Missoin Veng Hotshots hneh lovin an tla a, Zanin dar 8:30-ah Mission Veng Hotshots leh TBL ten semi-final an khel ang. 

Nizan inkhelah khelh hmasaka tlawm zawk Mission Veng Hotshots an khel thaa Tuikual South lakah 92-83 a hnehna changin final luhna kawng an hawng. Semi-final match-ah hian BCA laka tlawm tawh Khatla TBL an hmachhawn dawn a, zaninah Khatla TBL hi an chak a nih chuan final an lut tlang thei nghal dawn a, Mission Veng Hotshots erawh final lut turin tum hnih tal an chak a ngai thung. 

Tuikual South leh Mission Veng tana inkhelh pawimawh takah hian fans lamin player te an au phur hneh bawk a, inkhelh tan atangin a boruak a tang nghal at a, chak nawn ngei tum Tuikual South lamin bul an tan tha a, first quarter-ah 24-20 in hma an hruai nghal. 

Quarter hnihnaah hmahruaitu zawk awm lovin an inkhel tawk hle a, boruak lamah an inhnehtawk ang bawkin point lam pawh a inthlau thei lo, quarter hnihna a tawp meuh chuan Mission Veng Hotshots lamin 25-24 in hnehna an chang a, chawlhlawk an hmang. Quarter thumnaah hian Tuikual South lamin 25-18 in hnehna an rawn chang let. 

Quarter li-na khelh dawn hian Tuikual South lam chuan point 10 laia hmahruai an hruai a, an chak nawn tawh dawn emaw tih laiin Mission Veng an rawn tho chhuak a, 29-10 zeta rawn comeback-in an rawn lehthal chiang hle. 

Mission Veng Hotshots tan foreigne player Joshua Aaron Keyes  chuan point 38 a nei a, Tuikual South tan foreigner Darrell Bowie chuan point 27 a nei thung. 

MSL-ah hian kan mizo tlangval te che a hmuhnawmin team tan thawhhlawk thin viau mah se pian phunga lian zawk an foreign player midum te chetthat leh that lohah team tin an innghat niin a lang.

Total Period 1 Period 2 Period 3 Period 4
Tuikual South :83-24-24-25-10
Mission Veng Hotshots :92-20-25-18-29

TUIKUAL SOUTH BC
Lalnunpuia - 29 pts - 6 rebounds - 2 assists - 2 steals.
Darrell Bowie - 27 pts - 13 rebounds - 3 blocks - 6 assists - 2 steals.
Dennis Lalmuanpuia - 15 pts - 9 rebounds - 3 assists.

MISSION VENG HOT SHOTS
Joshua Aaron Keyes - 38 pts - 17 rebounds - 2 blocks - 7 assists - 1 steal.
Samson Lalchhuanawma - 20 pts - 3 rebounds - 5 assists - 2 steals.
Zonunsanga - 18 pts - 2 rebounds.