British Conservative politician Rishi Sunak chuan Zirtawpni tlai tawh takah khan an party hruaitu lu ber ni tura inthlan chuh tura thlawptu neih ngai zat a nei tling ta a. Prime minister hlui, Boris Johnson chuan a chanvo chelh tawh thin chelh tura kir leh a tum mek laiin Cabinet member Penny Mordaunt-i pawhin inthlan hi chuh a tum tih a sawi chiang tawh bawk.

Liz Truss-i’n party hruaitu leh prime minister atana an thlan chhan puitlin zo lova inchhala a bân hnuah UK-a rorel lai party hian hruaitu thar an thlan a ngai a, an thlan chhuah chu prime minister ni zui tur a ni bawk.

Mordaunt-i hi Truss-i a bân hnua chuh tum insawi chiang hmasa ber a ni.

Hetih lai hian inthlan hmasaa Truss-i hneh lotu, Sunak chuan inthlan chuh tura an party MP 100 tal thlawpna hmuh a ngaih chu a hmu tling tawh a. “Tory MP atangin 100-nain a thlawp ta, #Ready4Rishi,” tiin senior backbencher Tobias Ellwood chuan Zirtawpni zan khan Twitter-ah a tar lang a. Mi dangte pawhin Sunak-a’n a mamawh zat thlawptu a neih thu an sawi hlawm bawk.

Sunak-a hian mi dang chuh tumten Tory MP 100 thlawpna an hmu zo ve lo a nih chuan amah chauh chuhtu niin party hruaitu a ni ang a, prime minister a ni nghal bawk ang.

Hetih lai hian prime minister hlui, Johnson-a chuan Caribbean-a a chawlh hman titawiin a haw a, inthlan chuh ve ngei a tum nia sawi a ni a; mahse, a tu ve ve mah hian an chuh dawn tih an la sawi lo.

Parliament-a Johnson-a thian tha, James Duddridge chuan a pu hlui nen hian WhatsApp hmanga thil an sawi dun thu erawh a sawi.

“‘Kan ti leh ang chu,’ tiin a sawi a ni,” tiin MP hian a sawi tih Sky News reporter chuan a sawi a, Johnson-a’n thlawhnaa Dominican Republic a chhuahsan lai thlalak pawh a tel.

Hetih lai hian inthlan chuh a tum thu sawi hmasa bertu, Mordaunt-i chuan ‘bul tan thata party inlungrual leh ram pum thatna tur ngaihtuah turin’ a chuh dawn thu a sawi.

Mordaunt-i hi Johnson-a a bân pawh khan a aiawh tumin party chhung inthlan kha a lo chuh tawh a; mahse, a tawpah Truss-i leh Sunak-i a ngam lo va, Sunak-a pawhin Truss-i chu a hneh lo zui veleh ta tho a ni.

Party hruaitu thlannaa chuhtu tur tan hian Thawhtanni zan thleng hun a la awm a, chuh tura an MP 100 tal thlawptu neih a ngai a, MP 347 an nei mek a, mi pathum bak chuh thei an awm dawn lo tihna a ni.

Eptuten inthlanpui neih duh

Ni 44 chauh prime minister ni hman chauhva bâng leh ta, Truss-i a bân hnuah hian UK-a eptu party-te chuan inthlan that ni ngei se an duh hle.

Truss-i hi kumin kumtir lama Johnson-a a ban hnuah rorel lai, Conservative Party-in an hruaitu atana an thlan a ni a, a ni rei lo hle a. A aiawhtu tur hi Oct. 28-a tihfel hman a nih beisei a ni a, hun reilo te kar danah mipuiin hruaitu an nei thar sek dawn tihna a ni.

Labour hruaitu, Keir Starmer chu heti tehsek hi thil pawm theih chi a nih loh thu sawiin Conservative-te chuan ‘British mipuite duh dan ngaihsak lek lovin hi a ler  atangin an hnuk kual’ niin a sawi a. “Inthlanpui neih ngei kan mamawh,” a ti.

Liberal Democrats pawhin hetiang bawk hi an phut a, “Conservative MP-te hian tun hi ram an hmangaihna an lantirna hun a ni a, ram dan hmasain mipuite hnenah thu sawina hun pe rawh se,” tiin an hruaitu, Ed Davey chuan thu a chhuah.