Aizawl: Mizoram-a Kawlphetha siam chhuahna lian ber, megawatt 60 siam chhuah theihna, Tuirial Hydro Electric Project (HEP)-ah tui a tam tawk loh vangin megawatt 17 bawr vel chauh siam chhuah mek a ni.

ZALEN thudawn danin, power house-ah turbine pahnih, megawatt 30 ve ve pechhuak thei bun a ni a, tunlaiin tui a tam tawk lo a, hemi vang hian khawl pakhat chauh hmangin ni khatah megawatt 17-18 vel a siam chhuak.

Tuirial HEP thawktu ten ZALEN an hrilh danin, tuikhuah ah metre 68 aia a hniam tui a tling thiang lo a, tun dinhmun ah metre 2 velin tui chim theih chin a la khuh thei. Tui a tam tawk loh avangin mipuiin kawlphetha an hman tam lai (peak hour) ah kawlphetha siam chhuah thin a ni.

Tuirial HEP a kawlphetha siam chhuah zawng zawng hi Mizoram tan pek vek a ni a, inremna angin zaa 12 chu Mizoram sawrkarin a thlawnin a dawng a, a bak chu unit khat Rs. 4.55 velin Mizoram sawrkarin a lei.

Tuirial HEP hi 14.1.201-a hnathawh chhunzawm leh a nih hnuah NEEPCO ten project siam hna thawkin  December 16, 2017 khan PM Narendra Modi-an  a hawng a ni.