February 28, 2024; Chief minister Lalduhoma'n sawrkar hmasain a lo tihtawp tawh, mega watt 24 pe chhuak thei tur Tuirini small hydel project tihnun leh tumin hma an la tih house a hrilh.

Vawiin Assembly Budget Session ah he thu hi sawiin, chief minister chuan, environment tihchhiat an phal loh avangin, Mizoram lui te khuah vek an tum lo tih a sawi a, chutihrual chuan mamawhna avanga tih loh theih loh erawh a awm tih a sawi. Compensation leh forest clearance vanga chhunzawm theih loh te a awm niin a sawi bawk.

Mega watt 24 pe chhuak thei tur Tuirini Small HP chungchang sawiin, Lalduhoma chuan, externally added project atangin New Development Bank in a finance tur a nih thu leh 1.25% chauh a pung tur a nih thu a sawi. "A project a tha hle, kum 19 atana tih a ni a, kum 15 chhunga rulh tur a ni. A DPR hi March 2007 ah buatsaih a ni a, a kal zel a, tichuan, kum 2022 ah Vbc. 584 ngai tura chhutchhuah a ni," ti bawkin, "Nikum inthlan hma lawk November thla chho velah khan sawrkar hmasa in a lo drop ta a ni," a ti bawk.

"Hei hi kan ui em em a, tihnun leh tumin tunah hian hma kan la," ti bawkin, Lalduhoma chuan, "Kan tinung leh thei angem tih kan chiang lo a, mahse kan indawr leh tan mek tawh a, tih theih hram nise kan duh," tiin, "A that em em na chu power lo chhuak tur hi a vaiin kan ta tur a ni," a ti bawk.