FRONTLINE WORKER zingah dose 1-na 10,639-in la tawh
Aizawl: Health Department chuan tun kar atang hian mipuiah Covid-19 vaccine pek tan a tum a. Zirtawp tlai thleng khan hriselna lama thawk (health care workers) mi 5,659 hnenah Covid vaccine dose hnihna pek an ni tawh.

Zalen-in State Immunization Officer Dr. Lalzawmi hnen atanga thu a dawn danin tunkar chho atang hian mipui ah Covid vaccine hi pek tum a ni tih a sawi a. “Vaccine hi kum 60 chin chunglam leh kum 45 atanga 59 inkar, natna benvawn neite hnenah pek phawt kan tum a. Inbuatsaihna leh tih neuh neuh ngai a awm avangin kan pek theih zat tur leh kan pek hun tur tak hi kan la sawi thei chiah lo a ni,” a ti. Dr. Lalzawmi chuan naktuk Thawhtanni hian mipui hnena vaccine pekna hun hawnna (launch) neih a ni dawn nia sawiin hemi hnu hian sawrkar leh private damdawi in ah te pek tan a ni dawn nia sawiin, “Sawrkar damdawi in ah hian a thlawnin vaccine hi pek a ni dawn a, private-ah erawh chuan tlem chawi a ngai ve dawn a, chawi ngai zat hi a la hriat theih mai loh a ni,” a ti bawk.

Dr. Lalzawmi chuan mipui hnena covid vaccine an pek dawn tak avang hian Co-Win II ah Mizoram chu a lut tawh dawn nia sawiin Co-Win I a health care workers leh frontline workers te hnena vaccine la pek zawh loh chu chhunzawm zel a ni dawn tih a sawi bawk a. “Co-Win II ah hian mi eng zat nge vaccine kan pek theih dawn kan la hre lo a, vaccine hi a lo thlen belh kan beisei a, thawktute indaih dan a zirin kan pek zat tur hi chu a hriat chauh dawn a ni,” a ti bawk.

Health department chuan Zirtawp tlai thleng khan hriselna lama thawk mi 5659 hnenah covid-19 hri danna vaccine dose hnihna an pe tawh a. Zirtawpni bikah khan Mizoramah Covid-19 hri danna hi hriselna lama thawk mi 783-in dose hnihna an dawng a, Frontline worker mi 1,031-in dose khatna an dawng bawk.

Mizorama Covid-19 vaccine pek tan a nih January 16, 2021 atanga Zirtawpni tlai thleng khan health care worker mi 11,358-in Covid-19 hri danna dose khatna an la tawh a, mi 5,659-in dose hnihna an la tawh a. Frontline workers zingah mi 10,639-in dose khatna an la tawh bawk a ni.