Football hi khawvel huap infiamna lar ber ti ila kan sawi sual awm love. The beautiful game an tih mai football hi ram tiin kan khel a tih thei a, tin a player te pawh infiammi zinga hmingthang ber ber an ni bawk. 

Football hmanga ram leh ram inelna buatsaih thin FIFA World Cup chu infiamna kutpui lian leh hlut hlawh ber zing ami a ni a, hei bakah hian khawmualpui hrang hrang ten in elna an buatsaih thin chuan hlut a hlawh hle bawk. 

Tun hnaiah Euro 2020 leh Copa America 2021 an khel zo va, tah khan khawvel player lar leh team tha ber ber an inlan hlawm a ni. Tun tumah hian continent hrang hrang-a player tha ber an thlan chhuah kan han tarlang dawn a ni. 

#5 Asia/Australia - Son Heung-Min (South Korea/Tottenham Hotspur)
   Khawmualpui hran nimahse Asia leh Australia hi hlawm khata dah an ni a, chuta footballer tha bera thlan chu South Korea mi Son Heung-Min hi a ni. Tunah hian Tottenham Hotspur tan khelh mekin Premier League forward tha ber pakhat a ni mek a, club lamah South Korean international hi Harry Kane nen inkawpin, tunlai Premier League player inkawp fuh ber zinga mi an ni mek. Son-a hian technique sang tak neiin ball a thiam hle a, a footwork dik leh chan-khan a hriat em vangin lehlam pawl defender te rilru tihahtu a ni. 

Kum 29 hian season liamta khan  Tottenham Hotspur tan game 51-ah inlanin goal 22 thunin assist 17 a nei a, ram tan competition hrang hrangah game 93 khelhah goal 27 leh assist 17 a nei tawh bawk. 

#4 North America - Christian Pulisic (United States/Chelsea)
    A talent tha em vangin Christian Pulisichi nikum chhunga Premier League player langsar ber pawl a ni a, kum 22 mi chauh la ni mahse, kum 2019-a Borussia Dortmund atanga Chelsea a zawm hnuah player langsar leh pawimawh ber a ni chho der tawh. 
    Blues tan game 79 a inlanah goal 18 thun tawhin assist 14 lai a nei thei. 'Captain America' tia hming lema an phuah sak Pulisic hi a kal chhona turah hma hun eng tak a la nei chungin North America footballer lar leh thiam ber a ni der tawh. 

#3 Africa - Mohamed Salah (Egypt/Liverpool)
    'The Egyptian king' an tih mai Mohamed Salah hi season li chhung chu Liverpool tan ropui takin a khel tawh a, 2018-20 chhung a UCL leh PL an chawi theih nana thawhhlawk ber pakhat a ni. 
    Salah hi a ball khalh thiam leh a goal shoot nat em vangin goal bulah a hlauhawm em em a, hei vang hian goal a thun theih phah a, tin, a taimain team tan a thawkrim em em bawk. Liverpool tan game 204 a khelhah goal 126 thunin assist 49 a nei tawh. Premier League Golden Boot hi tum thum lai dawng tawhin tun season pawh a chetha chho tan nghal hle. 

#2 Europe - Robert Lewandowski (Poland/Bayern Munich)
    Mimal chawimawina hlu leh lian dawng rih lo mah se Robert Lewandowski ropuina erawh sawi nep theih a ni lo. Kum 10 chhung zet a club leh ram tana a thawhrah zozai avang hian Polish international hi tunlai striker tha ber a tih ngam awm e. Nikum khan a chet that em vangin Ballon d'Or chu atan bel chhung sa ang maia ngaih theih tawh a nih laiin vanduaithlak takin Covid-19 hri leng vangin sem chhuah a ni lo. 
    Kum 32 mi Lewandowski hi a finishing leh a positioning that em vangin complete striker an tih ang hi a ni a, a hun takah a hmun tura alo awm thinna leh a finna sang tak hi a thiam ti hnuntu chu a ni ngei ang. 
    Season liam tak khan Lewandowski hian Bundesliga-ah goal 41 zet a thunin season khat chhunga goal thun tam ber record Gerd Muller-a goal 41 chu a khum. Lewandowski hian Bayern Munich tan game 331 khel tawhin goal 297 leh assist 65 a nei tawh. A ram Poland tan goal 69 leh assist 23 a nei tawh bawk. 

#1 South America - Lionel Messi (Argentina/PSG)
    Khawvel footballer piang tawh zinga ropui bera mi tam takin an pawm Lionel Messi hian, a ram Argentina chu tun hnai khan Copa America cup a chawipui a, Barcelona chhuahsanin Paris Saint-Germaina a zawm thar bawk. Player chawimawina sang ber Ballon d'Or tum 6 dawng a record siamtu hian Copa America-ah khan Golden Boot leh Best Player Award a dawng kawp thei a nih kha.
    A khelhna thin Barcelona-in sum lama harsatna an tawh vangin loh theih lovin Neymar Jr. leh Kylian Mbappe te nena khel turin PSG a zawm ta a nih kha. Season liamta khan Messi hian La Liga-ah goal thun tam berin Pichichi trophy a dawng nghe nghe. Phek hnih khat leka a ropuina leh danglam bikna ziahlan sen loh Messi a hlawhtlinna leh chawimawina dawn zozai pawh hi sawi mai sen a ni lovang. 
    Footballer piang tawh zinga ropui ber pakhat Lionel Messi ropuina hi sawi tam ngai lovin South American footballer thiam ber tih loh rual a ni lo.