Sample latute’n thinhrik hlawh, Silchar-ah sample lirtheiin phur thla thin, Covid ambulance buatsaih

Aizawl: Covid-19 test na chu tunkar chhung hian Zoram Medical College, Falkawn ah peih hman tum a ni a, tunlai hian a khawl dahna tur in chu ngawrh taka sak mek a ni.

Zalen palai thudawn danin State Referral Hospital, Falkawn a TB Research Centre chu ti changtlungin Mizoram University laboratory a khawl te nen tangkawpin Covid-19 test na hi kalpui tan tum a ni a, khawl dahna tur in pawh peih tep a niin tunah hian mithiam 4 chu Silchar Medical College-ah training tir mek an ni a, an lo haw hunah Covid-19 test hi tih nghal theih tum a ni.

India rama damdawi lam thuneitu sang Indian Council of Medical Research (ICMR) chuan covid test na hi India ramah a tam thei ang ber awm tura a duh avangin test remtihna pawh a pek theih nghal beisei a ni. Covid-19 enna khawl Polymerase chain reaction (PCR) hi uluk leh him taka dah a, bio safety level 3 a ngaih avangin a in sak pawh uluk a ngai bik hle.

Zoram Medical College thawktute chuan covid sample latu ten hmun thenkhatah enhran leh thinhrik an hlawh tih Zalen palai hrilhin pawi an tih thu an sawi a. Sample latu te chuan fimkhur takin thil an kalpui tih sawiin a hlauhawm loh laiin hmun thenkhatah harsatna an tawk chuan thawktute rilru a tina hle niin an sawi a. Mi thenkhat inringhlel ten ZMC ah sample test an tih dawn pawhin motor neitu ten an phur duh thin lo nia sawiin fimkhur tak leh hmai vel khawih a nih loh chuan a inkai theih loh a.

Test hi tih theih a nih loh chuan Mizoramin a tuar zawk thei nia sawiin a hri vei te hmuh an ni lo ang a, a darh nasat phahin thihna a thlen dawn tih ZMC thawktute chuan an sawi a. Mipuite chu an dinhmun hrethiam tur te, inringhlel te chu in test tir zung zung turin an ngen tih Zalen palai an hrilh bawk.

Zoram Medical College chuan nimin atang khan sample lak duh State Referral Hospital, Falkawn a kalna nei lo tan Covid ambulance a buatsaih a, a mamawh tan Ph. No. 9436743459 & 9383212171 ah te biakpawh theih a ni.

Covid-19 sample hi a tirah chuan NICED, Kolkata ah a thawn niin Gauhati Medical College-ah thawn lehin thlawhna service a tawp tak avangin Silchar Medical College ah tunhnai atang khan thawn a ni. Thudawn danin Health department thawktu ten sample an lak chu motor hmangin phurhthlak thin a ni a. Hriattheih chinah mi 28 sample lak tawhah mi 1 positive in mi 26 an negative a, mi 2 result hriat a ni lo. Nimin khan mi 12 te sample thawn leh a ni.