Central atang hian India ram politics hi group 2 lian pui puiah a inthen phawk a. Chu chu UPA leh NDA a ni. UPA group hi Congress an tam ber thin avangin an kaihruai deuh a, NDA-ah BJP an len ber avangin an kaihruai ve thung a. A eng zawk maha tel lo pawh chhe tê chu an la awm ve reng.
Central-ah sorkar thar a piang a, chutah chuan Mizoram atang pawhin MP pahnihte hian an awmna lam tur an tihchian a ngai a. Helaiah Congress hi an elpui ber thin anih vangin MNF chuan Congress tel lohna lam lamah an tel a ngai hrim hrim.
Tun inthlanah hian UDA nge sorkar ang a, NDA tih chu kan chhut a ngai a, tun dihmun takah chuan hriatthiam a har hle. Thawk khat lai khan Rahul-a farnu a takin Congress a han zawm a, boruak chu a siam deuh emaw tih theih a ni. Mahse, inthlan a hnai tial tial a, a boruak chu a dai leh deuh. Ragasthan, Madhya Pradesh leh Chhatishgarh-ah Congress an han chak viau a, hman ai chuan MP an ngah phah ngei ang. Mahse, 44 atanga 272 han kai tur chuan an la rinawm mai si loh. Hetih lai hian seat 96 chu an nei mai thei.
Pu Duhoma’n PM hial atan pawha iai loh Bengali nula TMC pawh a tlahniam deuh dawnin a lang leh si a. BJP-in 2014 ah seat 2 emaw chauh an la a, tunah chuan hma an sawn ngei dawn.
Hmarchhak MP 25 awmnaah hian Assam MP 14 nei an pawimawh ber a, BJP an tlachhe deuh tawh tura ngaih anih laiin AGP leh Bodo-hoten puih an han tum thar leh takah hian Congress ai chuan an lak tam zawk a rinawm leh ta a, Seat 25-ah seat 18 vel chu an la mai thei. Odisha-ah BJP an chak ang a, Andra-ah Congress ni lo lo chak ta se, Bihar-ah Congress lo lam an chak leh hmel a, UP-ah pawh BJP an la tha zawk ang. Delhi bial 7-ah AAP MLA 70 nei chu chak tura ngaih an ni bawk. Telengana-ah BJP leh Congress ni lo, Kerela-ah Congress lo lam, Maharasthra-ah leh Gujarat-ah BJP leh a thawhpui an chak ang. Tamil Nadu-ah chuan AIADMK or DMK an chak leh ngei ang a, Punjab-ah erawh MP 13 an awm a, Congress chak tura ngaih an ni.
Tunkar chho hian Mizorama kan induh loh siak BJP hian hma an sawn leh tlat mai a, hriatthiam a har ta a ni. PM tura rin Modi-a leh Rahul-a hi han khaikhin ta i la. January khan Modi-a a tlahniam deuh a, March-ah hian a sang leh ta tlat lawi a. Inthlan hma karhnih tha zet chauh a awm tawh a. Hemi chhunga hmasawn zawk zawk an sorkar dawn niawm tak a ni. Awn lam nei lem lova thlir chuan BJP leh thawhpuiten seat an lak tam ber a rinawm.
A thuhrimah amah Pu Duhoma’n a sawi angin Vai party hi chuan tumah hi min hmangaih tak tak lo. BJP leh Congress-te hi thuhmun reng an ni. Kristiante nekchepna tura dan siam thuah phei chuan Congress-in an ti nasa ber zawk a. Duhthusamah chuan Mizoramah BJP, Congress leh National Party reng reng hian Unit nei miah lo se, tualto party pahnih lian tak tak awm se la. Tamil Nadu-a DMK leh AIDMK an inlal chhawk chhawk ang deuhin, Central-a sorkar a piang kan tana tha tur tawkin thawhpui mai thin i la. BJP leh Congress angte Mizoram anga thawhpui hi chu mipuiin hnawl vek i la. BJP duhlotu intiten he laia Congress an thawhpui leh duh tho hi chu a ho khawp mai. Congress leh BJP hi kei chuan ka duhloh dan a inang reng a, Zoram tana an that lohna hi a thuhmun reng.
India atanga Independent-na kawng a inhawng thar leh a (13.09.2007 UN thupuan). Chu lah chu kan politician tam tak leh NGO-te pawhin kan ngaihven peih der si lo. CAB tihte politics khelh nan intihlarna tawk velin kan vei vel mai maite pawh a ang hle. Hemi dodala invenna kan neih dan tur lam kan ngaihtuah lo. Hman ni deuha Protectorate State kan rawn ziahte kha a chian tehlul nen NGO hruaitu tak ngialte pawhin min tuipui lem lo hi a mak tih bak sawi tur ka hre lo. Nimin maiah erawh chuan ZPM MLA Pu Vanlalhlana’n UN thupuan resolution House-ah a pulut a, rorel lai party leh midangten an thlawp vek a. Chief Minister berin a tuipui ta bawk a, tlem chuan hma lam kan pan tan ta niin a lang. India-a nawr tur nge UNO-ah tih erawh chu ngaihtuah deuh a ngai ang.
Kum 2015-a Pu Vanlalzawma resolution an passed tawh bawhzuina awm miah lo, vawiina Mizoram rorelna sang bera pass a lo ni leh ta hi a lawmawm takzet a. Bawhzui ngei tawh ni se, political partry mai ni lovin NGO zawng zawngin bawhzui i la. IAS pakhat chhuahna tura Hnam Hnatlang koh aia pui zawkin ram pum tak meuhin buaipui i la. India-ah hian kan lungsi tak tak thei chuang lo. Kan zalenna dar lo ri thar leh ta hi i bawhpelh lo ang u.
Vai party Delhi-a headquarters nei hian min tibuai ni berin a lang a. Mizoram chhunga headquarters nei lo party, eg.BJP, Congress,etc.hi thiat vek i la, dimdawih tawh lo ang u. Chuti chuan politics-a kan inchirhthehna tenawm tak tak hi a reh deuh mahna. Kan hnam hian vaizia leh sapzia kan la nasa lutuk a, kan khawlo zo tawh a ni ber mai. UNO thupuan zulzuiin tharum tel lova Independent kan sual leh a ngai a ni ber. Thangtharte pawh hnam politics-ah harh rawh u.
Hman zana Central lama Opinion Poll hrang hrang lakah chuan UPA aiin NDA an sang rih a. Central-ah a khawi lam pawh sorkar se, Mizote tana kan himna tur tawka kan inven a ngai a ni ber. CAB pawh tumahin kan duh lo a, inchirhtheh nana hman talh tumte hi a khekrek thlakin inlungruallohna thlentu mai a ni, i sim mawlh ang u.
Tun dinhmun mekah hian NDA-252, UPA-147, others-144 rin dan tlangpui a ni a. Danglam zel thei a ni a, sorkar turin MP 272 neih a ngai si a.