ZALEN, December 13, 2025: Tun hnai lawka Twenty20 Plate-a champion Mizo tleirawlte chuan one day trophy-ah pawh hnehnain bul an tan a. Inrinni khan Women’s Under 19 One Day Trophy Plate 2025-26-a an inlan hmasak berah wicket riatin Sikkim an hneh.

Board of Control for Cricket in India (BCCI) Women’s U-19 One Day Trophy Plate inkhel hmasa ber hi Lady Amritbai Daga College Ground, Nagpur, Maharashtra-a khelh niin thum vawra chak Mizoramin vawm hmasak an thlang a, an tifuh viau a, over 40.1 chhungin Sikkim hi run 81 chiah siamtirin an vawm thi hman vek.

Mizoram tan Zothanmawii Rokhum (Jojo-i) chuan over 8.1 a vawmah run 12 chiah pein mi pali a awm hlum a. Captain Jacinta Laltanpuii pawhin wicket hnih a la bawk a. Sikkim batter pali lai run siam miah lova vawm thiin run 10 vaw chhuak tling pawh pahnih chiah an awm. 

Chak nana an mamawh run tam lo tak an umnaah Mizoram tan opener Vanlalruatpuii chu a tawp thlenga damin ball 58 a hmachhawnah run 48 a siam a, Karie Chakma-i pawhin thi lo bawkin run 17 a siam a. Over 19 lek chhungin mi pahnih thiin an mamawh run an thawk chhuak thei a ni. 

Mizo tleirawlte hi thla hmasa mai khan Women’s U-19 T20 Trophy 2025-26 Plate-a champion-in season tharah Elite huanga inlan turin an inhlang kai a. One day trophy-ah pawh hian Plate chhuahsana inelna sang zawka an inlan thei tura nomawi lak leh ngei an inbeisei a, rinkai ber an ni bawk.

INKHEL KHAIKHAWMNA:

Sikkim - 81/10 (Over 40.1)

Snika - 31 (81)

Zothanmawii Rokhum - 4/12 (Over 8.1)

Mizoram - 85/2

Vanlalruatpuii - 48* (58)

Karie Chakma - 17* (40)

Wicket riatin Mizoram an chak.

MIZORAM KHELH HMABAK:

December 15, 2025 - Mizoram vs Tripura

December 17, 2025 - Manipur vs Mizoram

December 19, 2025 - Arunachal Pradesh vs Mizoram

December 21, 2025 - Meghalaya vs Mizoram