Aizawl May 23, 2023 ; Aizawl Two Wheeler Taxi Association (ATTA) President  Lalhmunmawia chuan State Transport Authority (STA) rate bituk chu long run-ah member-ten zawm tha khat mah se, Aizawl chhungah erawh zawm kim a harsat thu leh sawrkar nena inrawn tawna rate bituk that an duh thu a sawi.

ATTA President Amawi chuan ATTA chu Mizoram Societies Registration Act, 2005 (Act No 13 of 2005) hnuaiah July 9, 2018-a inziak lut a nih thu a sawi a. Society Act hnuaia inziak lut an nih angin dan kenkawh thu-ah sawrkar aia hma an lak chak theih zawk tur thu sawi telin, tun aiin Transport Dept leh Traffic Police ten ATTA chhawr tangkai thiam se a duh thu a sawi bawk.

Vawiina PC Party Sr Vice President Lalrinzuala Chawngthu leh Gen Secretary H Lalremsiama ten ATTA office an tlawh a, ATTA President Lalhmunmawia leh S Lalrintluanga, Treasurer ten an lo dawngsawng a ni. 

PC Party chuan two wheeler taxi hi Aizawl mipui nena inhne hnai tak, mipui tana rawngbawlna pawimawh tak chelh a nih avangin an pawimawhna sawrkarin hria se, tun aiin mipui tan hmang tangkai thiam se an duh thu an sawi bawk a ni.

Tunah hian ATTA member 3,500 bawr an awm a, hmun thenkhat stand an neih lohna hmunah mimal hmun thla tin ₹ 46,000 chawia an luah thu leh hmun hrang hrangah stand fee an chawi thu PC Party hruaitu te hi an lo hrilh.