Blues chuan an veteran defender leh striker Thiago Silva leh Olivier Giroud te chu 2021-2022 season chhung Stamford Bridge-a cham chhunzawm turin an thlun ngheh thu an puang. Veteran Brazilian Silva hi nikum nipui lai khan free transfer-in PSG atangin an la lut a, Brazilian defender hi English football-ah a che che hran lo, season liamta chhung khan game 34-ah a inlan. 

Kum 34 mi French striker Giroud-a pawh 2022 chhung cham turin inremna siampui a ni. 

Chelsea director Marina Granovskaia chuan,"Nikuma Thiago Silva kan lakluh khan kan squad-ah world-class player kan seng lut tih kan hai lo. Thiago hi season kalta tluan khan a club Chelsea tan a hun takah a rah thin a, mual chhung leh pawnah hruaitu ropui tak a ni," tiin club website-ah a tarlang. 

Sawi zawmin, amah Thiago kan lakluh tirh khan a zarah trophy dang kan beisei thu kan sawi chhuak a, chu thu chu atakah changin Champions League nomawi kan chawi ta a nih hi, kumin pawh hian beiseina sang tak kan nei a ni," a ti.

Granovskaia chuan Giroud-a chungchang sawiin,"Olivier hian hun bikah club tan dinhmun pawimawh tak a luah a, goal 11 zet thunin kum 2018 khan FA Cup min chawipui a, a kum leh a Europa League kan champion theih nan pawh a thawh hlawk hle," tiin a fak. Giroud hian tun season a Champions League chawi tura an zin kawng tir lamah Atletico Madrid lakah goal pawimawh tak a khung a nih kha.