United Democratic Front (UDF) huaihawtin nimin khan Millenium Centre atanga Vanapa Hall kawt thlengin ‘Dikna kawngzawh’ neih a ni a. Buaina chhuak palh thei vengin Police thahnem tak duty tir an ni. Kawngzawhnaah hian MNF leh ZNP atangin thusawi ngaihthlak a ni a. Vanapa Hall kawtah resolution pahnih siamin, 'EVM Riging avanga mipui thlan lal nilo CM Lalthanhawla leh a thawhpuite hi an bang ngei tur a ni,' an ti a, 'Sorkar hi a bang lo a nih chuan UDF thalaite hi a tawp thleng kan tang zel dawn,' an ti bawk. Hemi hma, Zirtawpni zan khan UDF thalai nia hriatte leh Mizo Phantom Fans Club member nia sawi engemawzatte chu April ni 4, 2014 zana Local TV kaltlanga K Chhawnthuama'n EVM tihchingpen nia a sawi chungchang avangin Chief Minister chenna, McDonald Hill, Zarkawt-a CM Bangla lam panin an inhawrkhawm a, Police lam nen hun engemawchen an innawr hnu ah, boruak sosang lutuk awm zui lovin nimin zing dar 1 vel khan pungkhawmte hi an tindarh a ni.