Football lama tui mi tan Euro leh Copa America inkhel hmuhnawm en tur a awm laiin, UFC lama tui te tan pawh tukin dar 7:30 hian Glendale, Arizona-ah fight hmuhnawm a chhuak ve dawn.  

Tukin fight kan hmuh tur main leh co-main event-ah hian title fight pahnih a awm dawn a, insual tur pahnih te hi hun hmasa lama lo in hmachhawn tawh ve ve an ni bawk. 

Main event-ah hian light heavyweight lam huang zauh tum a light heavyweight champion Jan Blachowicz laka tlawm hlim Israel Adesanya chuan, a chungnunna middleweight lama a champion belt chu Italian fighter Marvin Vettori a lakah humhim a tum dawn a, Vettori hi 2018 khan Izzy hian split decision hmangin a lo  hneh tawh a, tun tumah hian an dinhmun fiahna tak tak a thleng dawn ta a ni. Title kawl mektu Adesanya hi middle weight huangah chuan a chungnung hle a, a tum tawh hneh loh ala nei lo. 

Adesanya hian lightweight lama a huang zauh chu chhunzawm rih lovin a lalna huang middleweight lamah tum tur a zawng leh ta zawk a ni. Tun tuma a tum tur Marvin Vettori hian Adesanya laka a tlawm hnuah fight vawi nga a hmachhawn tawh a, a la chak vek a ni. Adesanya nena an inbeih hmasa zawka a chak loh dan kha a la na hle a,  chuvangin tukin zing hian chak ngei tumin a beih a rinawm.  Vettori hi a chak a nih chuan  UFC-a Italian champion hmasaber a ni ang. 
Co-main event a nep dawn lo 

Co-main event flyweight championship a inbei tur pahnih Deiveison Figueiredo leh Brandon Mireno te hi an vawi hnih insualna tur a ni a, an intum hmasakah chak zawk awm lovin an in hnehtawk a, Figueiredo kha point paihsak chu nilo se, chak zawk thei dinhmunah a ding. Flyweight fighter pahnih insual kha fight hmuhnawm tia sawi a tling a, tukin an in fight tur pawh hian ngaihven a hlawh phah hle. 

An intum hmasak tum khan fight neih hmain Figueiredo kha a thil ei sual vangin  damdawi in pan pui a ni a, fight zawhah pawh kalpui leh a ni. Kha a damlohna vang khan a duh angin a che tha theilo niin a sawi. Tukin ah dam thain a khel tawh dawn a, a nep lo hle turah ngai ang. 

Deiveison Figueiredo leh Brandon Mireno te hi an insual hmasak tuma an fight kha fight of the year contender ni pha ngata ni. A nep dawn lo. An innuai hmasak tum khan beisei loh takin an inhnehtawk tiin judge ten thu tlukna an siam a, tun tumah erawh kha tiang kha a thleng tawhin a rinawm loh. A chak zawk leh chungnung zawk tak tak a hriat dawn a ni. 

Pa rothap Champion lai Figueredo hian hneh ngei tumin a beih tur thu a sawi a, hneh mai nilovin round khat naah a knockout tur thu a sawi piap piap mai. A tumpui tur Moreno hian hian indawh mai mai a tum bik hauh lovang le. 

Fighter pahnih te hi an weight division-ah chuan kutthlak naa sawi an ni ve ve a, UFC-ah hi chuan second khat chhung lek pawhin thil zawng zawng a danglam vek theih avangin  champion thar kan hmu lovang tih a sawi theih loh. 

Anni pali bakah hian insual dang hmuhnawm tak tak en tur a awm dawn a, main card-a inbeitur fighter lar pahnih Leon Edwards leh Nate Diaz te innuai tur pawh hi tum dang chu nise main event tling hial a ni. Fighter huaisen Nate Diaz-a fight hmu chak hi UFC fans zingah an tam hle awm e. 

Diaz hi kum khat chuang zen-zawn a chawlh hnua a fight hmasa ber tur a nih vangin tun hmalam a tluk phak angem tih chu zawhna lian tak a ni thei ang.

Main card
Middleweight: Israel Adesanya (c) vs. Marvin Vettori    
Flyweight: Deiveson Figueiredo (c) vs. Brandon Moreno
Welterweight: Leon Edwards vs. Nate Diaz
Welterweight: Demian Maia vs. Belal Muhammad
Light Heavyweight:  Paul Craig vs. Jamahal Hill