Football thiam ram tamna khawmualpui pahnih, Europe leh South America ten football tournament lian an khelh mek vangin mi tam zawk rilruah football-in hmun a chang lian rih viauin a rinawm. Chutiang karah chuan MMA lam ngainatute mit titlai turin tukin zing 7:30 hian UFC 264 chhawp sakin kan awm dawn. 

Tukin a fight kan hmuh tur lah hi fighter satliah an ni lo, mi tam tak tan chuan Messi leh Neymar-a te inkhel en aia thlanawm a nih ngei a rinawm. Insual kan hmuh tur chu tudang nilovin 2021 Forbes Magazine-in khawvel infiammi zinga sum thawkchhuak hnem bera a puan Conor McGregor leh Dustin Poirier te an ni tlat a ni.

He mite pahnih hi tum hnih inhmachhawn tawhin vawi 1ve ve an chak tawh a, tun tum hi a vawi thumna leh final fight ti pawhin a sawi theih awm e. Anni pahnih hi kut tum hmang thiam an ni a, inhnek an uar leh tura ngaih a ni. An ke hmanga an inpet zauh zauh bawk anga inbuan rup rup lam chu kan hmu lehin a rinawm loh. An  insual hmasak ber 2004 khan McGregor chuan round khatnaah Poirier hi hnek tluin che chhuak zui tur a awm lo. Kumin January thla khan round hnihnaah Dustin Poirier hian calf kick rawn hmang tangkaiin a mal a pet sil sak hmasa a, round hmasa a chungnung zawk Conor-a laka phuba lak nan a round hnihnaah a kut tumin a tuk zal ta a nih kha. Poirier hian a ke leh kut a hmang tangkai thiam hle. 

McGregor-a ralthuam tha bera an sawi thin a kut vei lam hmanga a counterpunch pumpelh dan Poirier hian a hre tawh hlein a hriat , chuvangin tun tumah hian phuba lak tumin vaupung tina viau mahse, Irish tlangval huaisen hi chungnung zawk tura dah ngawt chi a ni bik lovang. 

Eng zat nge an hlawh dawn
    UFC star Conor McGregor hming a rik tawh hi chuan pawisa a tam thin a, an hlawh zat tur hian ngaihven a hlawh fo thin. Tum engemaw zat chakloh tawng tawh McGregor-a hi tunah rih chuan a boruak len vanglai a nilo chungin a chak emaw chaklo emaw  $3 million bakah pay-per-view an hralhna atanga sum lut zawng zawng 60 percent a chang dawn a, Dustin Poirier thung hian US $1 million bakah pay-per-view atangin 40 percent a chang thung ang. 

Irish pa hian pay-per-view atangin sum a lalut hnem thei hle a, lightweight champion hlui Khabib Nurmagomedov nena an fight tuma PPV kha UFC history-a sum luh tamna ber a ni. 
Enge an sawi
    The Notorious chuan,"Ka tumpui tur Dustin hi a hliam vangin  cage atangin stretcher hmanga zawn chhuah a ngai ngei ang," tia a inhrosak laiin Dustin Poirier-a thungchuan, "A thusawi te hi engahmah ka ngailo, a hun trhlen hunah kan hria ang chu,” a ti.