Ui sa ei hi a zahthlak!

Fanai Familia Laltansanga
Vietnam ram khawpui, Honoi-a thuneitu, Hanoi People’s Committee chuan Honoi khawpui mite chu uisa ei tam tawh lo turin a ngen. “Uisa heh hi a zahthlak a, kan khawpui hmel a timâwk a, khawpui hmai a tibâl bawk a, ui â hri a leng ang tih a hlauhawm bawk a ni,” an ti a, zawhte sa ei sim turin hriattirna an chhuah bawk tak e.
Hanoi khawpuiah hian uisa dawr 1,000 lai a awm a, zawhte sa dawr a tam fu bawk.
United Kingdom-ah chuan uisa zawrh leh hralh khap a ni a, mahni ui vulh erawh an talh chuan a sa ei a thiang. Mahse, sap pachalin uisa an ei hmel loh khawp.
UK leh England hi kan ngaih pawlh fo. The United Kingdom of Great Britain & Northern Ireland hi United Kingdom tiin emaw, Britain tiin emaw an sawi mai thin a, ram pali; England, Northern Ireland, Scotland leh Wales ram insuihkhawm an ni a, a hrang theuhvin parliament an nei.
‘Rina lohva uibuk sa’ tih hi a awm a, Mizote hian hmanlai atang tawh khan uisa hi kan lo ei tawh ngei chu niin a rin theih a. Naupang pakhatin, “Uisa ei hi a ruih theih em ni?” a ti e, an tih hi zawhâwm reng tak pawh niin a lang bawk a. Uisa ei dawn hian ei huaina (Burmese-hovin ‘Sâ-kâwng’ an tih hi) lem hlek a ngai deuh a ni mai thei a ni. ‘Uisa ei thluak’ tih tawngkam hi hman deuh khan an chelek roh fu a, uisa ei ve lo tan chuan ninawm hlêi hlûi tak a ni.
Naupang zawhna zawh chungchang han sawi tak azarah chuan Blue Mount English School, Zarkawt-a ka thawh laiin kan zirlai naupang pakhat chu Sam 23-na, “The Lord is my shepherd, I shall not want,” tih hi Mizo tawngin kan lehlintir a, “Lalpa chu min vengtu a ni a, ka mamawh lo vang,” tiin a letling! He naupang hi rilru chak tak a ni a, chawimawi a phu a ni. A hming kha Simeia a ni ta em? ka chiang ta lo!
TAKAM UI, SUKI: Lunglei Zotlang Branch YMA chanchinbu Zo-aw-ah ‘Ui Sa Siam Dan’ tih article an chhuah a. YMA chanchinbua chutiang thuziak an tichhuak chu mak ka ti hle a, mak ka tih êm avangin ka chhiar chhuak dap a. A tawp lamah chân loh khanah min hruai lut ta daih mai a. Ui pakhat, Zovi an tih an lei a, an talh tur an vuak sual a, a tlanchhuak ta a. A bo hlen dawn emaw an tih laiin a hnu lawkah a lo haw leh a, “Zovi, Zovi” tia an han koh chuan a mei khup zal zalin a talhtu turte hnena a kir leh thu leh, han talh leh pawh rilru a hreawmzia a ziak a ni.
He article ka chhiar hnu lawk hian Mizoram khawthlang tawp lam, Nghalimlui leh Longpuinghat-ah thla khat pumpuhlum Sitting Supervisor of HSLC & HSSLC Exam 2018, official duty-in ka zuk thang a. Fimkhur thu hlaah Vasei Police station complex-ah ka invawm lut a. OC hnenah thil awmzia engkim ka hrilh hnu chuan ka mutna tura an tih MPRO office anga an hman chu ka zuk bel chiang a. A balin a tawp lutuk a, maimawm ril hi kil tinah a inzam niai nuaih mai a, an electric wiring chu ka han en a. A khai hian a inkhai hnuang hlawm vek mai a. Chhuat lah chu a balin a ngap ropui mai si a, riak lut ta ila, ka lungphur nasa dawn lutukin ka hria a. Chumi zan chuan OC quarter sitting room-ah ka mu ta a. Constable pahnihin an khum min ken an tum a, tlawmngaih chhuahin ka duh bik si lo va. A tuk zingah chuan OC chuan, “Kan mikhual ber chhuata i mu hi kan rilru a nuam lo hle a ni,” muang fan reih rawih hian a ti kauh kauh va. A Mizo rilru hle-in ka hria a.
A tukah chuan MPRO Office-a an hman pindan chu nileng deuh thawin ka thian fai a, ka insawn thla ta a. Chawke mei bul pakhat awmna MPRO office bal takah chuan riahrûn ka rem ta a. Chakma naupang kum 9 mi, rilru chak êm êm, kut rang tak, mobile khawih zei êm êm mai, Gyanayattan @ Argun-a’n min rawn riahpui ta bawk a.
OC quarter veranda ban pakhatah chuan Takam ui dum hi an thlung ran mai a. Uisa ei mi an nih dawn hi ka ti rilru a. Ni hnih vel an thlun hnu chuan constable Jonathan-a chuan an ui thlun chu a chhuah ta mai a, a bo dawn emaw an ti a, an mangang hman titih tawh a. Chutih lai chuan a lo haw a, a ngam em em mai a, a pute chu a chhaih a, an inum zar zar thin a. Chaw an pek that avangin rei lote chhungin a thau mum kang ta mai a. A hmul dum tliang tha tak chu sahriak hnawih ang mai hian a tle nalh a. A buaipuitu ber Jona chuan chu a Takam ui chu a hming a phuah a, ‘Suki’ a ti a. ‘Suki, Suki’ tia a han koh pawh hian Suki chuan a hming chu a hre lo a ni ang, a rawn hawi ngai lo va. Mahse, a pu Jona chuan ‘Suki’ a tiin a ko lui ve zel tho va.
OC leh a chennna quarter-a awm ve constable pahnihte chuan tukthuan an ei laiin ro an rel a, “Suki hi kan talh vat loh chuan kan ngaina dawn lutuk a, talh vat a tha ang,” tih a sawi a. “Lawngtlai atanga a bawlhho leh phuihnam te chah ila, kan awl deuh niah talh tur a ni,” tih ro pui an rel ta a ni.
Chumi hlan chuan Suki chu an lo ngaina hman hle ni ngei tur a ni a, a tuk tuk leh lawka an chaw ei laia an rorel chu a dang ta daih mai a. “Suki hi a ngainatawm êm mai a, ui dang lei tur kan hmuh chuan Suki hi talh loh tur a ni,” tih a lo ni ta daih mai a ni. Hmangaihna hi a lo va mak em! ka ti rum rum mai a. Hmangaihna hi chi hrang hrang a awm a, a Grik tawng chuan ka hre tam lo va, storge, philia, Eros, Agape tih angreng an nei a, ka sawi fiah rih lo mai ang a, mak tak maiin hmangaihna hi chi hrang hrang a awm a ni tih hi chu ka chiang a ni.
SUKI HUN TAWP A THLENG TA! Chutichuan, ui dang lei tur an hmuh zawh tak si lovah chuan ui ngainatawm tak Suki chu talh a lo ngai ta poh si a. Inrinni a ni a, Jona leh Ruatsaka leh Sangate chuan phur ang reng takin an tih tur ang ang chu an han ti ta zung zung mai a. An kal fua fua a, an pheikhai a zang hle a, an mawng pawh a zang narawh e. Kei chuan ui an han talh lai pawh hmuh ka duh lem lo va. Anniho chu phur fahran hian an han che ta a, an hlim hle a, an phur hle hlawm bawk a. Tlai lam dar 3 vel atang chuan an che ta malh malh hlawm a, an kut vei lamin a khat tawkin ‘thil’, uisa ei huaina an lem sek ta bawk a. Ruatsaka’n ui a lu chhum hmin tawh ka khel tan. Jonathan-an a bawlhlo a han deng vel chu nuam a tih hmel hle a, an hlim a, an nui sûng hlawm bawk a, ‘An kâ pawh zen ila, min seh lo vang,’ tih tur ang hian an mood a fuh hlawm a. Jonathan-a’n a bawlhlo suma a han deng chu a phur hle a, mawng kân sauh sauh chungin a deng soh soh va. Vanneihthlak takin hemi tlai hian Nghalimluia Hermon Comprehensive High School Headmaster te nupain chaw eiah min rawn sawm hlauh mai a. Phur fahranin, a thlun phelh an sawi ang vang vangin ka pit chhuak ta nghal a.
Zana ka va hawn chuan an lo la ri laih laih hlawm a, OC hi mi tha tak mai a ni a, thenawm pa zawng zawng chaw eiah a sawm hlawm a. Amah tak chuan zu a in ve hauh si lo va, a chaw eia a sawmte chu an lu ruh a ring tha ang reng hle hlawm a. Ui lu kheltu kha a zu rui a lo chatthla fel diam tawh.
A tuk tlaiah chuan uisa hrang khat tal ei ve turin kan nau Constable-ho khan min phut tlat mai si a. Ka ei ve atana an lo dah that, a kawchhung tuihnai lai lai kha tutein emaw an lo ei zo vek! “E,e, e! Kan uisa dahthat ei rutute hi tu dang an ni thei lo. Kan thenawm Chakma nuho hi an ni chiang mai,” an ti a, an nuih a za nasa ta mai a. An va chhuahchhal a, “Engvangin nge kan uisa kawchhung thuhruk in lo ei zawh vek?”an va ti. Anni chuan “Kan ni teuh lo mai a!” tiin an tang kawh ve tlat.
Ka tlangval lai, High School zirtirtu ka thawh hlima kan headmaster Rev. R.Lalchamliana thu min hrilh: “Uisa hi chu a zahawm lo êm mai a, ei aiin ei loh hi a finthlak zawk,” a tih kha ka hre chhuak rauh rauh mai.

DOWNLOAD OUR APP

Read latest news on your phone

Ui sa ei hi a zahthlak!

Latest News & Chhiar Hlawh