- Hruaia Kawlni Tun lai ram changkang zelah ran hmangaihtu an lo pung zel a, ran chunga ngilneina leh zahngaihna lantirte pawh kan inzir tir nasa ve ta hle mai. Chutih rualin hmanlai kan pi leh pute hunlai atang kan lo chin thin in leh a vela kan chenpui leh kan vulh uar ber, a sa pawh tam takin tui kan tih em em, Uisa chungchangah hian ngaihdan a inrual lovin a sa pawh a ei duhin tui an tih em em rualin a ei ve loten an thinhrik dan leh an duh loh dan chu inpersan ang reng tak a ni lawi si. Kum 2/3 liam taah khan Punjab Assembly House-ah MLA pakhat Ajit Singh Mofar chuan an khaw lai auitla mai mai tual ui tam tak chu Hmarchhak leh Mizoram lamah uisa an ei thin tih thawm hriain a Hmarchhak mihringte tham lo zawng takin chung uite chu rawn thawn vek mai a duhthu a sawi chhuak a, titi pawh a ti tam hle a nih kha. Kan tunlai boruakah ui hmangaihtu pawl leh uisa sera eizawngte ngaihdan leh duh dan a inpersan viau a, Aizawlah ngei pawh hei avanga thu inchuh leh dan hmanga inman tir emaw, mi dang zalenna rahbeh emaw, invauna emaw rawngkai kan hre ta zeuh zeuh mai. Khawvel hmun dang leh kan Asian-pui thenkhatten uisa an ei ve nasatzia hi tlem i lo tarlang tel teh ang. Khawchhak ram hrang hrang heng - China, Indonesia, Taiwan, Philippines, Laos leh Vietnam-ah te mai bakah Mexico-ah te pawh an lo ei nasa ve tho mai. Hnam upa China-ho hian Confucius hun lai daih tawh khan an lo ei tawh a, An hmanlai chanchin ziahna (Zhou Dynasty hunlai)-ah pawh ransa ei tur a vulh an ziah zingah chuan vawk, kel leh ui an lo ti daih tawh. An philosopher Mencius-a phei kha chuan Mizo thlahtu ni mai awma mawiin uisa hi sa tui ber ani a lo ti daih tawh. Mexico ram cheng hmasa, Aztecs-ho pawh khan uisa an ei thin. Asia ram rau rau zingah Vietnam-ho khian an uar zual emaw tih tur khawp a ni a, chutah pawh hmar lam hian chhim lam Vietnam aiin an la uar leh zual zawk. An khawpui Hanoi-a In Nhât Tân Street, Tây Ho District-a thingpui dawrah te phei chuan an siam nasat mai bakah sa dang ai pawhin a to zawk thin. Uisa hi ‘Thit’ tiin Cho North Vietnam lamah chuan an ti a, chhim lam Vietnam-ho chuan Thit cay an ti thung. Indonesia-ah chuan Batak Toba culure nena inzawmna nei zingah uisa ei an tam a, an culture nen a inzawm tlat avangin an hun pawimawh bik, inneih leh Krismasah te an uar zual. Korean-ho hian uisa soup Bosintang an nei a; amaherawhchu, kan ui vulh pangngai ang ni lo, a hrana siam (breed) atangin an soup hi an siam thin a ni awm e. Taiwan-ho hian thlasik laiin uisa an ei thin a, chutah pawh ui dum sa kher an ei thin a ni awm e. Seoul 1988 leh Beijing Olympic, tun hnaia neih laia thingpui dawr menu-ah uisa an telh loh chungchangte leh Uisa hrim hrim chanchin hi tam tak internet lamah en tur a awm a, hetah chuan kan sawi vek seng lo ang. Taiwan leh Philippines-ah te hian tun hnuah ui talh hi an khap na a, thingpui dawr thenkhatah hmuh tur a la awm tho. Tin, South Korea leh China-ah pawh khawvel hmun hrang hrang atanga Olympic mikhual an haw hnu chuan thingpui dawr menu dan chu a khauh chhunzawm vak lo a ni awm e. Heng uisa ei hrang hrang hian Mizoten ui thisen lum lai natna eng eng emaw atan a tha tura kan ngai ang deuh hian sa dang aia mihring taksa tana tha turin an ngai fur mai. Natna chauh ni lovin mipat hmeichhiatna (Sex)-ah pawh pui thei tur anga ngaihna pawh a tam awm e. Asia ram hmun dangah pawh hian keini Mizote ang thovin uisa ei zingah hmeichhia aiin mipa an zam zawk niin a lang. Mizo culture-ah hian uisa hi a bet tel tlat a, hmakhawsang atangin kan lo ei thin tih pawh kan inthawina sa zinga a tel ve hian a tichiang hle awm e. Kan pi leh pute kha ei leh bar an hniang hnar em em lo tih kan hria a, chu chuan inthawina sa kha inthawinan chauh ni lovin an ei nghal thin tih sawi ngai awm lo ve. Chuvang chuan kan culture-a bet tlat tun thleng pawh a la reh lo a ni a. Tin, a chunga kan sawi tak kan culture milpui leh kan khawchhak unau, keini aia kum za tam taka upate pawhin khawthlang ram (European/Western)-hovin an chin ve loh vang emaw, hmanlai atanga an pi leh puten an chin dan chu ram dang mi, thlahtu hran daihten an lo tih ve ngaih loh vang mai a khapburna dan lek mai ai chuan hmanlai atanga an lo tih thin, an culture-a bet tlat chu a ei duh apiang tana ban phak mai turin an la siam reng hlawm. Taiwan leh Philippines te anga dan siam a, chu dan hmang thlapa kan la khap ve si loh chuan Aizawla uisa dawrte leh restaurant thenkhata uisa plate menu-a telhte hi chuti mai chuan a tawp dawn lo va, sa dawr dangte aia tawp leh tenawma an zuarte a nih si loh chuan zak chungchunga an zawrh emaw dan ilo leh ngilneihna tel lova uisa ser ta maiah chuan kan puh bik thei dawn em ni?