Aizawl; Ukraine leh Russia thuhnuaia awm Crimea rama Mizo zirlai awmte chu an him tih he rama India Ambassador chuan New Delhi-a Mizoram House hotu, Ranbir Singh, IAS, Resident Commissioner a rawn hriattir nia thu dawn a ni. Ukraine/ Crimea-a buaina awm mekah, he rama Mizo zirlai awmte hi him dama an awm theih nana hma la turin Chief Minister Lal Thanhawla chuan tunhnai mai khan Union External Affairs Minister leh Union Minister for Overseas Indian Affairs-te hnen-ah ngenna a siam a. Ministry of Overseas Indian Affairs chuan rang taka hma la nghalin, Ukraine-a Indian Ambassador Rajeev Chandra, IFS chuan Mizo zirlai awmte chu an him thu leh ngaihtuahawm an nih loh thu Ministry of OIF a hriattir a. Chiaina tur a awm loh thu leh, India hmarchhak (NE) mi zirlai pahnih pawh ngaihtuahawm an nih loh thu a rawn hriattir niin thu lakna chuan a tarlang.