ZALEN December 6, 2024 : MNF Gen. Secretary Dr Vanlaltanpuia, Ex MLA chuan Nationalism awmzia chu hnam rilru put ringawt nilovin ram leh Hnam tana pen chhuah a, a taka Zonunzemawi nunpui a, chet chhuahpui a ni, tiin mahni mai bakah midang lainatna leh ngaihsaknate chu hnam hmangaihna dik tak a ni, a ti.

December ni 06, 2024-a Mizo Hnam Run chhung inkhawmah Dr. Vanlatanpuia chuan, "Zofate zingah inpumkhatna a lian chho zel a, Geographical boundary chuan Zofate inunauna a daidang theilo a, thinlunga inkungkaihna leh a taka chet chhuahna chu ram leh hnam hmangaihna (nationalism & patriotism) dik tak a ni," a ti. Mizo Nationlism-ah thanharh zual zel a ngai a, Mizoram-in hma a sawn zel nan lêh Hnam a boral loh nan zirna ngai pawimawh hmanga Nationalism a taka lantirin, tan lak zual sauh sauh a tul thu a sawi bawk.

Dr. Vanlaltanpuia chuan, "Thangthar te kutah Nationlism hi kan dah thiam a tul thu sawiin, Thangthar te pawhin Infiamna lamah te, lehkha zirna kawngah te, Ruihhlo do na kawngah tan kan ngaih zia leh hnam boral lohna tura tana ke kan pen nasat a ngai," a ti bawk.

Dr. Tanpuia chuan ZPM sawrkar a hmuh dan leh an kal dan demawm a tih thu leh an sawrkar hma-a an intiam ang lo zela khawsa an nih thu sawiin, "Kan ti ang an tih chu, kan ti lo ang, an tihna ang zela a ngaih thu a sawi a. Mipui tan a ding tur anga lang si, Mipui tan a harsatna siamtu zawk an nih zel. Sawrkarna an siam hmaa an insawi dan leh an manifesto te nen thlirin, tuna an kaldan chu a inpersan hle a ni. ZPM in, 'kalphung thar, mipui sawrkar' an zawrh kha anmahni ngei hian tunah hian an bawhchhe mek zel a. Oil man tih san te, Buhfai man tih to te chu an sawrkara langsar zual a lo ni ta a ni. Social media-a an chakna hmangin thalai leh mipui an bum mek zel a, Mipuite kan harh a hun hle a ni," a ti bawk.