bengal-ah BJP an hek hlek

April-May thlaa West Bengal-a assembly inthlana hnehna an chan hnuah TMC chuan BJP hruaitu lawk tak tak an la lut ta nual a, eptu party hi an hek hle.

Supriyo-a hi tun hnai maia BJP hruaitu zinga rorel lai zawm pangana a ni tawh a. A hmain BJP MLA pali ngawtin an lo zawm tawh a ni.

Trinamool hruaitu, Kunal Ghosh chuan BJP hruaitu dangte pawhin an party hi an zawm zel dawn a, indawrna a kal mek zel tih a sawi.

“BJP hruaitu eng emaw zat chu Trinamool hruaitute nen an inbe mek hlawm reng a. BJP-ah hian an lungawi tawh lo a ni a. An zinga pakhat, Pu Supriyo-a chuan vawiin hian min lo zawm ta a, naktukah pawh mi dangin min zawm an duh leh a, hetiang hian a kal zel dawn a, lo nghak ula, lo ngaichang zel rawh u,” tiin news agency ANI hnenah a sawi.

Kum 2019 Lok Sabha inthlanah khan Bengal-ah hian BJP an che tha hle a, kumin inthlanah pawh an bei nasa em em a; mahse, a hniam zawngin an kal leh mek thung.

Union minister hlui, Babul Supriyo chuan Bengal Chief Minister Mamata Banerjee-i kaihhruai, Trinamool Congress chu Inrinni khan a zawm leh ta.

Supriyo-a hi thla hnih kal ta khan Environment Ministry-a minister of state a nihna atanga bân a dil anga bâng a ni a, a hgnu lawkah eng party mah zawm lo tur leh politics a chawlhsan tur thu a sawi.

A inruahmanna hi thlak lehin MP a nih zui tur thu a sawi leh bawk.    “Hum remchang a lo awm chuan thutlukna siam mai tur a ni a, hetiang hian thutlukna ka siam ta a ni,” tiin Supriyo hian TMC a zawm chungchangah Inrinni khan thuthar lakhawmtute a hrilh.

Supriyo-a hi Prime Minister Narendra Modi-a kaihhruai sorkara union minister atanga a bâng kha mak tih a hlawh hle. 

“Ka tan pawh a hrehawm,” tiin July 8 khan Twitter-ah a tar lang a, hemi ni hian union minister atanga bângin a thu tar lan pawh a paih a, a hlim thu a tar lang zui leh daih a ni.