Juventus atangin Manchester United hmelma hlun Manchester City a zawm mai dawn emaw tih hnuah kum 36 mi Cristiano Ronaldo chuan kum 12 hnuah a club hlui Manchester United a zawm zawk ta hlauh a, Ballon d’Or tum nga dawnga major trophies 30 chuang chawi tawh Ronaldo manah hian United hian pound maktaduai 24 an seng. 

Old Trafford-ah ropui taka kum 6 chhung a len chhung khan Cristiano Ronaldo hian Manchester United tan Premier League title  3, UEFA Champions League 1, Club World Cup 1, FA Cup 1 leh League Cup 1 a chawi hman a, game 292-ah inlanin goal 118 lai a thun bawk. 

Kum 36 mi Portugal captain Ronaldo hian Sporting Lisbon atangin United hi kum 2003 khan a zawm a, record ropui tak nen kum 2009 khan Real Madrid a zawm leh a, chumi hnuah Junvetus tan ropui takin a khel leh a ni.     

Eng tikah nge a inlan dawn
    Zanin hian United chuan Wolves an len chilh dawn a, mahse Ronaldo hmel erawh kan la hmuh hmel loh. Juventus a chhuahsan fel hma hian Serie A lama chinfel loh te tihfel a la ngai bakah September thla tir hian an ram Portugal tan international match a khelh leh phawt a ngai dawn. 

A lan dan chuan September ni 11-a Old Trafford a Newcastle nen an in hmachhawn hunah Man United tana a debut vawi hnihna chu a khelh hman chauh hmel. 
Kar khatah a hlawh hnem dawn

Ronaldo chuan a club thar Manchester United lamah kar khatah pound 480,000 lawih a hlawh dawn a, tihian Premier League hlawh sang ber a ni dawn ta ni a. Ronaldo rawn lan hma hian Manchester City midfielder De Bruyne chu Premier League player hlawh hnem ber niin £385,000 a hlawh a, hlawh tam ber dawttu United keeper de Gea chuan De Bruyne aiin pound sing khat-in a hlawh hniam thung. Ronaldo ai hian De Bruyne hian £100,000 dawnin a hlawh hniam chungin Messi leh Neymar ten PSG lama an hlawh nen chuan ala intam hleih hle thung. Messi hian pound maktaduai khat thuak hlawh dawnin a team-mate Neymar pawh hi player hlawh hnem ber pawl niin £600,000 a hlawh hem dawn. 

Man Utd share a pung
    United lama Ronaldo kir leh vang hian Manchester United share chu 8 per cent ngawtin a pung nghal. Ronaldo hi social Media lamah a lar hle a, Instagram-ah zuitu 334 million neiin Twitter follower 93.7 a nei mek bawk. United a zawm thu an puan atang darkar hnih lek chhungin United Instagram follower hi milliom khat chuangin an pung hman. 

Beih zui tawk Ronaldo
    Rin loh tak maia Ronaldo-a’n Old Lady chhuahsana Old Trafford a pan chuan Juventus fans te a tilawm lo hle a, twitter hmanga trending in #CristianoRonaldo hashtag an kalpui a, football fans sang tam takin social media lamah Ronaldo transfer hi an khel nasa hle a ni. A bikin Juventus, Manchester City leh Manchester United tantute an tam zual.  

Ronaldo-a’n Juventus a season thum a hman chhung khan a khel chhe hran lova, game 134 a khelhah goal 101 lai thunin Serie A top scorer a ni chungin fans te hi a chungah an lawm thei chuang lo.