March 5, 2024; Ngopa a neih zawh tak KTP General Conference-ah thuchham lar tak leh sawi hlawh tak Kelkang nula C. Lalnunfeli'n a chham a, kha thuchham phuahtu Upa Lalnunpuia Hrahsel in a phuah chhan ZALEN a hrilh.

ZALEN in a biakna ah Upa Lalnunpuia Hralhsel chuan, KTP khawmpui lian atan an ngen angin thuchham a phuah tih a sawi a, a sawitu tur dik takin thiam takin a chham ni-ah a ngai, Kelkang bial kaltlangin rawngbawlna remchang Pathian in a pe ah a ngai bawk.

"Kum naupangte ka nih atangin ram veina ka nei a, ram leh hnam humhalhna lam te pawh ka vei thin. High school ka kallai pawhin ka khawchhuahna Kawnpui thatna tur ka vei te ka lo ziak tawh," Upa Lalnunpuia Hrahsel chuan a ti.

"Pathian thu leh nun dan tha zirtirna leh literature tih hlutte hi ka tum a ni a, ka tuipui a, ka phak ang tawkin chumi lam hawite chu ka naupangte pawh ka zirtir thin..." a ti bawk.

"Eiru te hi hi an khawngaihthlak a, an lan chhuah ve tawh mai si loh avang hian an tan hian a har em em a, an thlarau lam nun a khawhar lutuk. Hmanah chuan eiruk hmangte hi ka haw thin a, tunah chuan ka khawngaih tawh, chumi lam hawi chu ka thuchham phuahah pawh ka tarlang thin," Upa Lalnunpuia Hrahsel chuan a ti.

Govt. Mizo High School a zirtirtu hna thawk mek, an chhungkua a Luangmual (Aizawl) a khawsa Upa Lalnunpuia Hrahsel hi thu mai ni lo, hla lamah pawh mi langsar a ni a, thu a ziak a, thuchham a phuah a, hla a phuah a, thu a hril bawk thin.

Kelkang harhna thlen vanglaiin a hla phuah 'Harhna ropui' in Mizoram a lo nghawr nghing tawh a, tunah Kelkang nula hmangin a thuchham phuah chuan Zofate hnenah thuchah ropui a puang chhuah leh ta mek a nih hi.