ZALEN, Apr. 13, 2025: Chawlhkar kalta Zirtawpni khan Mizoram University (MZU) event hlawhtling tak ‘Virthli’ chu khar a ni. A khar nan ‘Runway Showdown’ hmuhnawm tak buatsaih a ni. Hetah hian showstopper-ah Indian internet personality leh television actress, Urfi Javed a inlan — sawi a hlawh hlak!

Kumin ‘Runway Showdown’-ah hian Mizo designer hlawhtling ber zinga mi, Escape Engmawia chuan a kut chhuak mawi tak takte chu Mizo leh Femina Miss India, model hming langsarte thlang lovin, showstopper-ah model pawh ni lem lo a rawn hmang. Chu chu Urfi Javed a ni.

Urfi Javed hian nghawng a nei lian hle! Social media leh YouTube lam thlengin a chah chhuaktu, Virthli buatsaihtute thlengin khel a hlawh a; politics huang chhunga kai lut tum talh pawh awmin party inbeih nana lo hmang pawl an awm.

Hemi chungchangah designer Escape Engmawia chuan, “Urfi Javed kha ka chah chhuah liau liau a ni. MZU te, MLA pahnihte leh sorkar chah chhuah a ni lo. Tu sum mah a tel lo,” tiin ZALEN Thalai Khawvel a hrilh.

Escape Engmawia chuan, “Kha thilah khan thenkhatin politics inbeih nan lo hmang pawl an awm hi a tha lo. Designer ka nih angin Virthli Runway Showdown 2025-ah show partner ka ni a. Kha show kha MZU tih a ni tawh lo, ka duh dana programme-te pawh duang ka ni a, kha show kha zirna leh sakhuana nen pawh a inkungkaih lo bawk a. Tumah mawh tur an awm lo a, thil engmah ka tih sual pawh ka hre lo. Ka thuam siam haa khawvel hmuha min pho chhuahsak turin a hun laia fashion-a thalaite mit fukna hnam dang hmeichhe pakhat ka chah chhuak a ni ve mai. Hnam dang nu hian tu pawi mah a sawi ka hre lo,” a ti.

He thilah hian party mi leh sa thenkhat chuan politics-a inbeih nan an hmang. MLA pahnih — Lunglei North bialtu MLA V Malsawmtluanga leh Aizawl South III bialtu MLA, Baryl Vanneihsangi te hming a ri chhuak. Hemi chungchang pawh sawi chhuakin Escape Engmawia chuan, “Pu V Malsawmtluanga hi ka Vangchhia-pui a ni, ka unaupa leh ka thianpa a ni. Ani hian MLA a nihna ang ni lovin kan inunauna angin Zopa takin airport lamah tihfel ngaite min buaipuisak a. Show lamah pawh thalai a nihna ang a, thalaite fuih turin ka sawm bawk,” a ti.

Baryl-i chungchang pawh sawiin, “Hun rei tak atanga ka thian tha, ka thuam design min haksak thintu a ni. Min support tura ka ngenna leh thalaite hmakhua min ngaihpui avanga show-a rawn lang a ni. Chubakah, a laizawn, Sophie kha model a ni a, a rawn tawiawm bawk,” tiin ZALEN Thalai Khawvel a hrilh.

Mizo designer chuan, “Sorkar hnain min daih lo tih kan hria, entertainment leh fashion vangin mi tam takin ei kan zawngin, chhungkaw tam tak ei tur atan hna kan siam ve. Kan hmasawnna tur min ngaihtuahpui theih si loh chuan mi thil tha tih chu en liam lo zir ve mai se tha tur,” tiin, an tuinaah tak ei an zawng a, nuam an tih thu leh tumah an sawisel hman ve loh thu a sawi.

Sorkar atangin eng hamthatna mah dawng ngai lo mah se, an vui lo tih sawiin Escape Engmawia chuan, “Kan tihtheih tawk tiin, kan kutchhuakah te ‘Made in Mizoram’ kan ti ve hram hram a. Ram dangin kan ram, Mizoram hi hria se tiin theihtawpin kan tang ve a. Chubakah, kan kutchhuak vete hi Mizo ringawtin lei se kan inchawm zo lo ang, ei ruk tur kan nei ve si lo,” tiin, an eizawnna kawnga an kutchhuakte tihlarsaktu tur an sawmte an lo helh em em chu politics hri tha lo tak a nih a rin thu a sawi.

Engkim hi politics lama inbeihna atana hman zel a nih chuan tute mah hian hma an sawn theih a rin loh thu a sawi a. A mikhualte, ni hnih khat lek chamte tal chu tha taka an lo welcome hi an tih tur a nih thu leh, mi rilru dik tak pua ram hmangaih tak tak chuan tha an tih ve tho a rin thu a sawi bawk.