Urlawk leh Kumhlui thlah zana curfew bawhchhia sum chawi tir Nuai 2 chuang tling

Admin - Jan 01, 2022

Urlawk zana curfew bawhchhia an man sum chawitir tling khawm chu Rs 99,700 a tling a, Kumhlui thlah zan khan curfew bawhchhia pawisa chawitir hi Rs 1,15,900 a tling leh bawk

Aizawl; Krismas leh Kumthar vuakvetah Aizawl khawpui chhungah night foot patrolling neih thin a nih thu police hotute chuan ZALEN an hrilh a, curfew bawhchhia zan tin mi 100 chuang man ziahin Urlawk leh Kumhlui thlah zana pawisa chawi tlingkhawm chu cheng nuai hnih chuang a tling niin police hotute chuan an sawi.

Laltanpuia Additional SP, Aizawl District sawi danin Hunpui laia zan lama duty tur hian police station/outpost 4 atangin zan tin patrolling party pahnih theuh an chhuah tir thin a, police lam duty chu an ngawrh hle a.  Hmun 26 ah police duty dah an ni a, entry leh exit point 6 siam niin Selesih, Muanna Veng, Zemabawk, Sairang Lengtawi, Phunchawng leh Mel 8 ah te duty dah an ni a. Aizawl khawpui chhung hmun 20 ah duty point siam a ni bawk.

Hunpui chhunga mipui an him zawk theih nan zu leh ruihtheih thil dangah theihtawp an chhuah tih police hotute chuan sawiin Rangvamual leh Phunchawng area ah zu siamna hmun zawn chhuah beihpui an neih mai bakah Mualdungsei ah darkar 24 chhung an duty tih ZALEN a hrilh a ni.

Rodingliana Chawngthu SP Traffic in ZALEN a hrilh danin Urlawk zana curfew bawhchhia an man sum chawitir tlingkhawm chu Rs 99,700 a tling a. "Kumhlui thlah zan khan curfew bawhchhia pawisa chawitir hi Rs 1,15,900 a tling leh bawk a, Mualdungsei lamah an tam bika a bak chu junction hrang hrang atangin a ni tlangpui a. Zu rui leh a kaihhnawih danga man awm nualin heng atanga pawisa chawi tir zat chu Rs 4900 a ni." tiin a sawi bawk.

Share now