ZALEN, December 24, 2025: Kum 2000 chho vel atanga Salvation Army Youth (SAY), Aizawl Temple Corp-in hnuchham leh tanpui ngai dangte puala kum tin an buatsaih thin, Zoram khawvela Urlawk Zan programme hriat hlawh ber tling phak, Coffee Nite chu kuminah huaihawt a ni dawn lo.

Urkawl Zan (December 24) apianga Temple Square, Aizawla buatsaih thin Coffee Nite hi mi tanpuina tur vehbur khawnna a nih piah lamah mi tam tak, a bikin thalaiten intihlim paha Krismas hmuah nan an hman thin a ni.

SAY, Aizawl Temple Corp hian chhan lian tak emaw, harsatna eng emaw an neih vanga buatsaih lo tur an ni lo tih ZALEN an hrilh a. An capr-ah kar hmasa lamah crusade an nei a, thlarau lama Krismas hmang tura an inbuatsaihna kal lai tihbuai a nih loh nan huaihawt loh tha zawka an hriat vang a nih thu an leader hnen atangin thu dawn a ni.

Coffee Nite hi kum 1995 vel atang khan mumal vak lovin kalpui tan a ni a, kum 2000 atang khan mumal zawk (official)-a kalpui tan a ni a. Hemi atang hi chuan kum 2023 tih loh chuan Urlawk Zan apiangin an huaihawt ta ziah a, Covid-19 len vanglai pawh khan a hmun pangngaia hmang lovin TV leh internet kaltlanga chhim theih turin an buatsaih tho a ni.

Coffee Nite-a sum hmunte hi an kohhranin hnuchham a enkawlna hmun, Motherless Babies’ Home tanpui nana tih a nih thin bakah a tul dang azirin mamawhtu hrang hrang an pe thin a. Covid lai pawh khan hri leng avanga puih leh tanpui ngai tam tak chhawmdawl nan hman a ni.