Drug lord lar ber zinga mi, Joaquín ‘El Chapo’ Guzmán-a fapa chu ruihhlo tawlh rua puhna avangin US-ah a chungthu rel tura lak luh a ni dawn tih US Attorney General-in a puang.

Ovidio Guzmán-a hi a unaupa nen a pa din, Sinaloa drug cartel kaihruai zuitu ber nia hriat a ni.

A nupui neihnaa zai duh lo zaithiam thattu ni ngeia hriat a ni bawk.

January khan Mexico hmar lama Sinaloa-ah man a ni a, tun thlengin la tantir a ni.

“Tuna rahbi thar kan rah tur hi Justice Department-in cartel-te chet lakna zawng zawng phin darh a tumnaa pawimawh tak a ni,” tiin US Attorney General Merrick Garland chuan an rama lak luh a nih tur thu puanna thuchhuahah a tar lang.

“Cartel-te donaah hian US leh Mexican dan kengkawhtu leh sipaiten an thawk nasa em em a, tam tak phei chuan dikna hlen chhuah a nih theih nan an nun pawh an hlan a ni,” a ti.

Garland-a hian US-a Ovidio lak luh a nih theih nana an puihnaah Mexican sorkar chungah lawm thu a sawi bawk.

Ovidio-a US-a lak luh a nih tur chungchangah hian Mexican thuneitute chuan engmah sawi an la nei ve lo thung.

Tun hnai lawkah khan a pa nupui kum 33 mi, Emma Coronel-i chu US-a November, 2021-a ruihhlo tawlh thubuai avang bawka man a nih hnuah chhuah a lo ni tawh.

A pasal hi Sinaloa cartel hruaitu a nih avangin Colorado-a venhimna khauh ber tan inah dam chhung tang turin a awm mek.

Ovidio Guzmán-a hi El Chapo-a leh Griselda López-i an inkawp lai, kum 1980 leh 90 chhova an fa pali zinga mi a ni a. A upa ber, Edgar-a chu kum 2008 khah kah hlum a lo ni tawh.

El Chapo-a hian a hmaa nupui a lo neih tawh leh a hnua a neih, Coronel-i te lakah fa dang pawh a nei nual bawk.

El Ratón’ (The Mouse) tia an sawi mai thin, Guzmán-a hi thla ruk zet zawn a nih hnuah Culiacán khawpui daiah man a ni.

Man a nih hian a pawlten buaina siamin bus leh car an hal a, inkahna nasa tak chhuakin mi 29 lai an thi zui a. Amah pawh lirtheia kalpui ngam lovin helicopter-in Mexico City panpui a ni.