Kumin chhunga a vawi khat nan Grand Slam-ah Rafael Nadal-a'n hneh loh a tawng a, US Open fourth round-ah American Frances Tiafoe chuan 6-4 4-6 6-4 6-3 in a hneh. 

US Open tum li champion tawh Spaniard Nadal-a tan, a Grand Slam singles title 23-na tur beiseina chu a thamral ta rih. He inkhelhah hian Nadal hian set li-naah 3-1 in hma hruai zet tawh mah se Tiafoe hian pawt thla leh quarter-final ah hian chakna a chang thei. Semi-final-ah hian seeded 9-na Russian mi Andrey Rublev a hmachhawn ang. 

An inhmachhawn tawh game hmasa pahnihah Frances Tiafoe hian Rafael Nadal hi a ngamlo ve ve a, US Open seeded 22-na Tiafoe hian Nadal a hneh hi a lawm hle a, a game-na tur point-a Nadal-a'n backhand hmanga net a rawn bel chiah chu leiah a racquet paih thlain a hmai hupin a chak vang hian a lawm hle a ni. 

Kum 24 mi hian,"Vawiin hian thil ropui danglam tak a thleng a ni. Sawi tur pawh ka hre lo. Khawvel player piang tawh zinga ropui ber pakhat ka hneh thei mai hi ka lawm em a ni, ka khelh dan kha awih har ka ti zawk," tiin mipui hmaah lawmthu a sawi.