US Open chu naktuk ni 29, August 2022 atang khian khelh tan a ni dawn a, nikum lama US OPen champion Emma Raducanu pawh khel turin a inpeih thawkhat tawhin a US Open title kawl mek chu hmuhim a tum dawn a ni.

Flushing Meadows, New York hmuna khelh tur US Open hian September ni 11 thleng a awh ang. 

Emma Raducanu hian New York-ah hian practice session nuam tak a neih theih loh thu a sawi a, theihtawp chhuahin  US Open title hum ngei chu a tum tur thu a sawi. 

Kum 19 mi Raducanu-i hian zirtawpni khan a practice naah a banrek a ti na a, hei hian a inkhelh hunah nghawng a nei dawn em tih chu hriat la nilo mah se nidang ai chuan khel a harsa deuh niin a sawi.

US Open-ah Heather Watson leh Paul Jubb te inlan thei dawn lo
    Britain mi Heather Watson leh Paul Jubb te pahnih chu qualifying tawpna berah an chak loh vangin US Open  main draw-ah an  lang phak lo. 

British number one hlui kum 30-na hmang mek Watson hi tunah hian world ranking 161-na a ni mek a, qualifying-a a hmachhawn hi  kum 16 a upa Czech mi Sara Bejlek niin 3-6 6-4 7-5 in a hneh lo a ni.  

Kum 22 a upa Jubb hi tunah world number 203 ni mekin Dutchpa Gijs Brouwer lakah 7-6 (7-3) 3-6 6-2-in a tlawm ve thung. 

Kumin chhunga Grand Slam hnuhnung ber tur US Open hi naktu atangin  Flushing Meadows, New York-ah khel tan a ni dawn a, mipa lamah Djokovic chu Covid 19 vaccine a lak loh vangin a tel an phal sak dawn.  

Watson-i chak zawh tak lohah chuan British hmeichhi pahnih chiah an inlan thei dawn a, direct-a khel thei te chu Emma Raducanu leh Harriet Dart te chiah an ni.

Mipa lamah Andy Murray, Cameron Norrie, Dan Evans, Jack Draper leh Kyle Edmund ten men’s draw an lut thung.