US Open khelh mekah top seed Iga Swiatek chu seeded nei phak lo Jule Niemeier-i a hneh teuh hle a, German nula lakah hian Swiatek hi 2-6 6-4 6-1 in a chak hram a ni. 

Kumin chhungin Iga Swiatek hian title paruk zet a la tawh a, chung zingah chuan French Open pawh a tel. Poland nula hian tun season-a a title pasarihna tur a beisei leh mek a ni. 

French Open champion hian Czech mi seeded 21-na Petra Kvitova hnehtu American Jessica Pegula a hmachhawn leh ang. Thawhtanni khan Czech mi tho seede 22-na Karolina Pliskova chuan finalist tum thum ni tawh Victoria Azarenka chu set thumnaah hneh hramin last eight a inhlangkai bawk. 2016 finalist Pliskova hian a kum zawna US Open quarter-final thleng turin Belarusian hi 7-5 6-7 (5-7) 6-2 in a hneh a ni. 

Vawiin lamah Arthur Ashe Stadium-a in hmachhawn tur seeded parukna Belarusian Aryna Sabalenka emaw seeded 19-na American Danielle Collins te chak zawk zawk a hmachhawn ang. 

Ashleigh Barty-i'n March thlaa inkhelh a chawlhsan hnuah Swiatek-i hi number one a ni chho a, tunah hian match 37 zet chu hak loh nei lovin a kal tluang mek rih a ni. Swiatek-i hian Doha, Indian Wells, Miami, Stuttgart leh Rome te chu Roland Garros a chawi hma khan lo chawi tawh bawkin hmeichhe tennis-ah a vawk lal len mek.