Aizawl April 26, 2024 : Mahindra & Mahindra Financial Service Ltd (MMFSL) Circle Head Ankit Bagree-a'n Aizawl Police Station FIR a thehluh bawhzuia Mizoram Police Special Investigation Team (SIT) ten hma an lakna kal zelah cheng vaibelchhe 150 chuang inbumna hmanga sum tichingpentu MMFSL Area Manager Jakir Hussain leh a thawhpui mi 10 te chu man an ni.

Jakir Hussain hian customer a tak tak awm lo mi 2000 chuang hmangin file lem a siam a, lirthei loan a pechhuak thin a ni, tun chinah hian a thluak bur ber nen hian mi 11 man an ni tawh. Tunah hian bank account 26 te chu khawih chet theih lova siam a ni tawh a, account khawih chet theih lovah hian Vaibelchhe 2.5 zet pawisa a awm a ni.

He case chhuina kal zelah hian car thar 15 chu hmun hrang hrang atangin man an ni tawh a, heng an car man te hlut zawng hi Vaibelchhe 3 man chuang a ni.

He case chhui tura din SIT te hian laptop 3, mobile phone 10, a lema siam customer file 549, seal lem 25, SIM cards 30 chuang, mimal dairy 2, identity document engemaw zat leh mi bumna atana hman hmarua te an man a ni.

Rinhlelh ber Jakir Hussain hian Mahindra Finance Limited hminga hmangin bank account lem a siam thin bawk a ni.

Aizawl-a car dealer pangnga, CK Motors Hyundai, NBE Tata, Rafael Nissan, Aidu Motors Renault leh Standard Motors-three wheelers te chu he case-ah hian an an tel ve niin Police lam chuan an sawi.