Vairengte ah Weightbridge dah tum; MIMA-in dah lo turin CM-ah thlen Aizawl; Mizoram sorkar, Taxation derpartment chuan Vairengte ah Weighbridge dah tumin hma an la mek a, hei hi sumdawngte leh mipuite tan a thalo a ni tiin hmalakna kal mek sut tur hian Mizoram Merchant Association (MIMA) chuan Chief Minister ah lehkha an thehlut. Taxation Commissioner Lalthangliana Varte chuan weighbridge chu mipuite tan a hnawk dawnlo tih sawiin, "lirthei thlan bik cement, rod, etc. phur te chauh kan buk dawn a, a thlawn veka kan buk dawn avangin mipuite ah harsatna a thlen dawn lo a ni," a ti a. Weighbridge bun tur hian ER Enterprise, Chanmari chu thlan an nih tawh thu leh ni 45 chhunga a bun hna zo tura tih an nih thu ZALEN palai a hrilh. Hetih lai hian Mizoram Merchant Association (MIMA) President PC Laldinthara chuan Weighbridge bun chu an duhlo tih sawiin, "Fur laiin motor a berh a, overload a awl em em bawk si a, a diklo a chawi a awm theih avangin keini chuan corruption intanna ah kan ngai a, kan duhlo a ni," a ti. MIMA President chuan waybill tel lo a bungraw lo lut thahnem tak a awm ang hian hetah pawh hian thil diklo a awm leh an hlau niin a sawi bawk.