ZALEN September 28, 2026: ZPM General Headquarters chuan vawiin khan an Party Office-ah chhung inkhawm an hmang a. Thu sawitu F. Rodingliana chuan, "Pathianin ZPM hi min hruai a, innghahna dang kan neih a phal lo a, Val Upa Council te pawh hi kan lo chhuang lutuk a ni mahna; chuvangin, anmahnia kan innghah lutukna te hi min ṭhiahsak a ni mai thei a ni," tiin, Pathianah chauh innghat turin party mipuite fuihna thu a sawi.

P&E Minister F. Rodingliana chuan, "Tun hnaiah Smart Meter chungchangah sawi neuh neuh a tam avangin Complaint Runpui hawn a ni a. Chuta complaint dawn zawng zawng chu 1340 niin, 1067 chin fel nghal a ni a, la chin fel loh 273 a awm a. A hmuna an connection leh meter en ngai 133 awmin, check meter vuah tur 140 a awm a, chung zinga 125 chu vuah a ni tawh a, call theih loh leh an awm loh vanga la vuah loh 15 an awm a. Check meter leh Smart Meter inmil 102 niin, Smart Meter kal chak bik hi 9 a awm a, kal muang 14 a awm bawk. Check meter nena compare a Smart Meter chak leh muangte hi testing bench-ah test leh tur an ni ang," a ti.

P&E Department -in Power-a indodelh nan theih tawpa hma lak mek a nih thu sawiin, "ZPM sawrkar chuan Electric Bill kan ti pung lo ang kan tih angin kan ti pung lo a ni . "Financial Year 2018-19 atanga Financial Year 2022-23 chhunga Domestic Category-a Power hralhna rate pun dan average chu unit khatah Rs. 0.40 a ni a. Hemi pun dan rate hian Financial Year 2023-24 atanga Financial Year 2025-26 chhunga Domestic Category-a Power hralhna average rate chu : 2023-24 - Rs. 6.31, 2024-25 - Rs. 6.71, 2025-26 - Rs. 7.11, 2026-27 - Rs. 7.51 a ni," a ti a. "Tunah hian Aizawl khawpui-ah consumer 1,30,000 vel kan awm a, Meter Reader hi mi 150 chauh an awm a ni. Chuvangin Smart Meter hian kan harsatna a tih ziaawm kan beisei a, theih tawp kan chhuah mek zel a ni," a ti.

Commerce & Industries lamah pawh theih tawp chhuah mek a nih thu sawiin F. Rodingliana chuan New Market Building sak mek chungchang sawi langin, "MNF Ministry hnuaia ACC Building bika seat pek ngei ngei tura inremna an siampui zat chu 1105 a ni a. Foreign Lane Building (ACC Annexe)-ah 314 an awm bawk a, a vaiin 1419 a ni a. 

Foreign Lane lamah hian emergency exit awm loa an lo tih avangin emergency exit tur hi ruahman leh a ni a. Hei hian seat eng emaw zat a tih tlem leh avangin seat awm thei hi a tlem sawt dawn a. Seat pek tura an lo tih hi an tam lutuk avangin an leng dawn lo a, a manganthlakin a changtu Minister tan phei chuan a luhaithlak hle a ni. Mahse, dan lo anga lo tih eng emaw zat en dik leh a ni a, seat tlem azawng chu a awm leh theih hmel," a ti bawk.