ZALEN February 3, 2026: Sports & Youth Services Department leh Innovations India te chuan February 14, Vanlentines Day-ah Aizawl International Half Marathon (AIHM) chu a buatsaih leh dawn a, he hunah hian Kenya leh Ethiopia lam atang pawhin rawn tel tum an awm.

African runner rawn tel tum te hi hian VISA pawh an nei vek tawh tih Sports Minister Lalnghinglova hmar chuan a sawi a, Protected Area Permit (PAP) an buaipui mek a, an hlawhtlin ngei a beisei tih a sawi bawk.

AIHM hi April 26, 2025 khan buatsaih a lo ni tawh a, khami tum khan India hmun hrang hrang atangin mi 1500 vel an tel a, Mipui, athlete leh official te feedback atangin a hlawhtling thawkhatah an ngaih thu an sawi.

Lalnghinglova Hmar chuan AIHM chu intlansiaka inelna a nih bakah, Mizozet zinga hriselna leh fitness nunpui tura inzirtirna tangkai tak a nih an beisei thu a sawi. Inelna a nih piahlamah Mizoram tlawhtute tan event pakhat, Mizoram mawina leh nunphung phochhuahna remchang a nih thu a sawi a. Tourism Event calender 2026-ah pawh telh a ni a ti.

He half marathon kaltlang hian Mizoram leh Aizawl hre lar zel se an duh thu Sports minister chuan a sawi a, AIHM atan hian October 15, 2025 khan Mizoram House, New Delhi-ah press conference a nei tawh thu leh January 21, 2026 khan Mizoram House, Guwahati-ah a neih leh thu a sawi bawk.

AIHM 2026-ah hian Half Marathon (21.1 km) Men and Women a awm dawn a, Open race (10 km) Men & women, Fun Race (5 km) Mens & women, Junior 95 (5 km) Boy & Girls (10-15) leh Senior/Veteran (5 km) - Above 60 yrs te a awm dawn a, Mipa leh hmeichhia hi category hrang zel tur a ni.