Aizawl: Nimin atang khan Vanapa Hall-ah COVID-19 sample test kalpui tan a ni. Sample test na kiosk hawnnah IDSP State Nodal Officer Dr. Pachuau Lalmalsawma chuan RAgT chu a rintlak thu a sawi.

Dr. Pachuau Lalmalsawma chuan tunhnaiah social media leh hmun thenkhatah Rapid Antigen Test (RAgT) Kit hmanga positive hmuhchhuahte a rintlak loh thu sawi an awm thin tih sawilangin, Rapid Antigen Test hmanga positive hmuhchhuahte chu positive chiang sa anga ngaih tur a nih thu Indian Council of Medical Research pawhin thuchhuah an siam tih a sawi a. ICMR inkaihhruaina siamah RAgT positive te chu hmun danga test ngai tawh lo an ni a, RAgT negative symptom nei site chu RT-PCR hmanga test leh tur a ni tih a sawi. Thuthang belhchian dawllo vanga chiai lo turin mipuite a ngen a ni.

State Nodal Officer on COVID-19 Dr. Pachuau Lalmalsawma chuan kar hmasa ‘kiosk’ hawng tura an lo rel tawh bawhzuina a nih thu sawiin, sawrkarin sample test tulte test kim vek a duh vangin ruahmanna hi siam a ni,  a ti a. Mipuiten awlsam taka an pan theihna tur hmun laili deuh a nih vangin Vanapa Hall hi thlan a ni a, Health & Family Welfare Department leh Aizawl DC tangkawpte hmalakna in Vanapa Hall-ah hian sample testna hmun 3 ah buatsaih a ni a, a hming atana pawh ‘Mega kiosk COVID-19 testing Centre’ phuah a nih thu a sawi. Aizawl khawpui hmun remchang dangte pawh hetiang ‘kiosk’ siam nan an dap mek thu sawiin, tun dinhmunah ‘kiosk’ dang 4 – Sihphir UPHC, Bawngkawn South Cultural Centre Hall, Dinthar YMA Hall leh Chawlhhmun Cooperative Society Building te kalpui mek a ni bawk tih a sawi a. Vanapa Hall-ah hian Pathianni tih lovah chuan nitin COVID-19 sample test hi a tih theih dawn a ni. Vanapa Hall phal taka hman tirtu Art & Culture department chungah lawmthu a sawi bawk a ni.

Dr. Pachuau Lalmalsawma chuan Health Minister ruahmannain June ni 25, 2021 khan State Field Laboratory Unit, IDSP, Directorate of Health Services te chuan Tawngtai Bethel Camping Centre (TBCC), Sakawrtuichhunah sample test runpui (mass testing) an neih tih a sawi a, mipa 483 leh hmeichhia 114, an vaiin mi 597 an test zingah COVID-19 positive hmuhchhuah an awm lo tih a sawi a ni. Sample test tur hian IDSP mi leh sa 18 leh Health Worker Training School atangin mi 21, an vaiin mi 39 an thawkchhuak a ni.