Mission chuan Varanasi-ah Tawngtai Inpui hawng leh Inkhawmpui hmangin kan kal a. Hemi hun hmang hian Mizo 153 leh Vai 500 vel kan kal a. Mizoram Chief Minister te nupa leh M.P. Pu C.L.Ruala pawh an tel ve a ni. Aizawl khawpui chhung leh a pawn atanga kal Prayer Network hi 23 atanga lo kal an ni a, heng bakah hian Delhi Mizo Fellowship atangin 11 leh Tahan (Myannar) atangin 1 an lo kal bawk. Tawngtai Inpui sakna hmun lei tur hian Varanasi Mission Chairman Rev. Lalmuana leh Secretary Upa Lalzuia Colney te chu kum 2011 khan an zu kal a, a hmun lei nan leh Registration siam nan hian Rs. 30,10,000.00 hman a ni. A hmun zau zawng hi 3164 Sq.ft.-a zau a ni. Tunah hian Ground Floor nen chhawng thum angin peih fel a ni ta. Ganges lui ralah Katesar-ah hian Mission in, ‘Isua Inlarna’ tih hi a awm tawh a, Tawngtai Inpui kan tih tak hi Varanasi khawpui laili lam, Mahespur-ah a awm a. ‘Tawngtai Inpui’ tih hming hi U.P. State hian Church tih an remti chiah lo deuh va, chuvanga Tawngtai Inpui tih a ni a, mahse, Groud Floor chu Biak In ang thova hman a ni. Hindu sakhua hian darkar 24 chhung chawl lovin dar an vaw ri reng a, tunah chuan Kristiante pawhin darkar 24 chhung chawl lovin dar kan vaw ri ve tawh ang. Kum 2010 khan Varanasi-ah hian Inkhawmpui kan neihin, Ganges lui kama an intihthianghlimna hmun kan tlawh a. Chutah chuan ni tin mi a sang tel intithianghlim tur leh mitthi hal tur te, dam lo thi mai tur Ganges tuia theh tur tein an kal thin a. Chung mite hmuh atan chuan vaukama Platform an siamah chuan hnam culture lam leh hmuhnawm chi hrang hrang an show thin a. Chumi ka hmuh chuan, keini Mizote pawh hian kan Culture lam mawi tak takte hi Chanchin Tha hril nan hmang thiam ila, Kristian la ni lo tam tak kan hip thei dawn a ni tih hi ka ngaihtuah a. Chutih lai chuan Cheraw kana World Record kan nih khan, YMA Branch pakhat chuan Cherew Music atan khan Halleluia Chorus kha an hmang tlat mai a, a inremin a mawi em em mai bawk a. Ganges luikama Cultural Dance show nan hian tha hlein ka hria a. Hemi hmunah hian a nihna takah chuan Kristian ten Programme va neih ve ngawt theih a ni si lo va, hnam Culture hmang chuan a theih si a. Hemi chungchang hi kan Art & Culture Minister te, Field Director te leh E.C. Committee-ahte ka thlen a. Mahse, huphurhawm deuhin an hria a ni ang, kan ngawi ta rih a. Tun tum Varanasi Inkhawmpuiah hian vanneih thlak takin Chaltlang Lily Veng Mizo Cultural Club chuan Mizo Culture lam chi hrang hrangte an rawn entir thei ta a. Mi 27 lai an ni a, Inrinnia Tawngtai Inpui hawn zawhah chuan a tual zawlah Cheraw leh khuallam te, lam chi hrang hrangte an entir ta a, hmuhnawm an ti hle. Pathianni a lo thlen chuan, chawhmaah Sacrament theh a ni a, chawhnu lamah chuan Ganges luipui kam, Rajendra Prasad Ghat an tih hmun Platform lam chu kan pan ta a, Ganges luipui kan Open Air-ah chuan Programme kan hmang ve ta a ni. Hetiang hi kan progarmme hman dan chu a ni: Chairman : Rajesh Kumar Mizo Cultural Dance: Chaltlang Lily Veng Short Speech : Pu Lalthanhawla, CM, Mizoram Solo : Anurang Thomas Special Item : Varanasi Field Ringtharte Solo : Ramdinmawii, Missionary Short Speech : Pastor Jaykar, Speeker. Hetiang hian tun tum Varanasi Mission Inkhawnpui chu hman a ni a, Kan Chief Minister hian tum hnih thuchah a sawi a, chu chu India ram chanchinbu lar tak takah Mizo ten hnam inremna leh natna hrang hrang tihdam theih rawngbawlna an hmang tih lam hawiin an chhuah a, India ramah kan hmingthat phah hle a ni. Speaker Pastor Jaykar hian Pathian thuchah thiam takin inkhawm apiangin a sawi bawk a. India ramah hian hmun thenkhat, Orisa angahte chuan Kristianten an tuarna nasatzia kan hria a, hnam Culture hmang hian Chanchin Tha hrilna hmatheha kan hman thiam chuan harsatna awm lovin India ramah hian Chanchin Tha kan puang zel thei dawn a ni.