Aizawl: AH & Vety department thawktute chuan tunhnaia vawk a thih chhan ber chu mi thenkhat ten phalna nei lova state pawn atanga vawk an lakluh vang nia an hriat thu an sawi. 

ZALEN zawhna chhangin AH & Vety department thawktu te chuan state thenawm Assam, Meghalaya leh Tripura ah te vawk pul hri (ASF) hi a la hluar hle a, heti chung hian mi thenkhat ten vulh atan leh talh atan an lalut a. Heng an lakluh tam tak hi a enfiahna hmun Vairengte check gate paltlang lo leh a ruka lakluh anih avangin hri hi a darh ta nia an hriat thu an sawi.         

Hei mai bakah mi thenkhat ten ASF vei nia rinhlelh vawk an talh vangin a sa leitu ten hmun hrang hrangah an pu darh ta nia an hriat thu an sawi bawk.

Hun engemaw chen vawk natna chi khat African Swine Fever (ASF) vanga vawk thi hriat a nih tawh loh hnuah tunhnai khan he hri hi Mizoram hmun hrang hrangah a inlar thar leh a. Hriattheih chinah ASF vanga vawk thi hi 384 an tling tawh a ni.

AH & Vety department chhinchhiah danin kumin hri leng thar hi a bikin Sakawrdai leh Champhai ten an tuar na zual a. African Swine Fever avang hian Sakawrdai ah ringawt pawh vawk 134 an thi tawh a, Champhai veng hrang hranga vawk thi zat chu 109 a tling tawh bawk. 

Vawk thi hi Aizawl khawpui veng hrang hrangah pawh a awm a, khawchhak tlangdung khaw thenkhat bakah Kolasib ah pawh vawk thi report a awm. Hriat theih chinah ASF vei nia hriat vawk 18 chu tihhlum an ni tawh bawk.